09 Mar 2026

Maloko a mokgatlho wa, Mosadi o Ruta Mosadi, o o simologileng ka 2013 kwa Molepolole, ba re pele ga ba simolola go gweba ka borotho, botshelo bo ne bo le thata ya lentswe.

Modulasetilo wa mokgatlho, Mme Morobele Seiso, o tlhalositse fa mokgatlho o thailwe ke bomme ba ba neng ba sa bereke, ba nna seopo sengwe gore ba ikinole mo leshekereng ka ntlha ya gore lenaneo la Ipelegeng le bontsi jwa bomme bo neng bo lebile gore le tlaa ba hira le ne le sa kgone go ba tsaya ka dipalo tse di ntsi.

Bontsi jwa setlhopha se, bo ne bo le mo dingwageng tse di masome mane go ya kwa go tse di masome a matlhano fa ba simolola mokgatlho mme mo nakong eno ba setse ba le dingwaga tse di fa gare ga masome a marataro go ya kwa go a supa le botlhano

“Re ne re gwetlhilwe ke tlala, re gwetlhile ke go tshaba go bereka kwa Ipelegeng. Tota e se go e tshaba, re lebile bontsi jwa dipalo tsa ba re neng re foletse khiro. Fa re leba bontsintsi jwa rona le gore go hirwa le batsadi ba rona ba tota ba senang thata ya go dira, re ne ra bona gore re ba sutele ka rona re santse re ka iphataphatela,” Mme Seiso a tlhalosa.

A re erile fa ba thaya mokgatlho o, ba ne ba bantsi,   mme mo tseleng bangwe ba latlhela toulo ka theko ya borotho e ne e le boutsana fa bangwe ba ne ba e nyatsa ba re ba tlhabisiwa ditlhong ke go tlhola ba tlhotlhoma le motse ba tshwere diemere ba rekisa borotho.

“Bangwe ba ne ba re bone ga ba ka ke ba itiela nako ka borotho ka gore bana ba bone ba ne ba bolawa ke tlale ka jaloa madi a borotho a sa kgone. Go ne ba ne ba bolelela ruri, mme rona ra itshoka le fa bana ba rona le bone ba ne ba motwa ke e ntshonyana,” Mme Seiso a tlhalosa.

A re bontsi jwa ba ba neng ba tlelwa ke boitlhobogo ba ne ba ikela kwa Ipelegeng fa bangwe ba ne ba ya go letela go bidiwa kwa Ipelegeng mme ga sala ba le bane. Bone jo, bo ne ba adimiwa ntlo ya boapelo kwa ntlong lehalahala ya motse mme ba nna ba wa ba tsoga le thekiso e e neng e le boutsana.

Mme Seiso a re e ne ya re ka lengwe la matsatsi ba kopana le rre wa motho mosweu, go tswa kwa USA e le le peace corp, a ba botsa gore ba dirang ka a ne a bona ba tsamaya ba akgile borotho ka diemere.

Rre yo, o ne a ya go ba bega kwa go bommaboipelego kwa khaseleng ya Kweneng, kwa ba neng ba tlhalosediwa gore ba tsenye kopo, go re ba thusiwe go reka didirisiwa tsa kapei ka lenaneo la nyeletso lehuma.

Go le pele ba ne ba apaya diphaphatha le mapakiwa ka meritshana, bareki bagolo e le babereki ba Ipelegeng.

A re ka 2017,  ba ne ba inaakanya le le naneo la  tshidimoloso ya go fa bana borotho kwa dikolong tse di potlana.

 

A re  go simolodisiwa ga lenaneo la go apeela bana, kgwebo ya simolola go itsetsepela ka ba ne ba apeela dikole ka bontsi kwaa Molepolole.

 A re kwa ntleng ga go apeela dikole, borotho bo ne ba simolola go rekwa kwa ditirong jaaka manyalo, dintsho, le batho fela ka ba ne ba utlwaeletse ka monate, lenko, tatso le bontle jwa bone.

Bomme ba supile fa e ne yare kgwebo e dira sentle, ba thapa banana mme ya re itsholelo e wela tlase ba patelesega go kgaogana le bone.

Ba re go ne go le bokete go bereka le banana ka gore ba bereka ka go kgoromediwa.

Ba re puso e tshwanetse go emisa tumelo ya gore banana ke bone fela ba ka godisang itsholelo mme e tshwanetse ya lemoga mongwe le mongwe fa a ka fiwa thotloetso lefatshe le ka gatela pela.

Le fa kgwebo e le boutsana, bomme ba, ba paka gore kgwebo e, e ba tlodisitse melatswana ka ba kgonne go ikagela ba bo ba kgona go godisa bana ba bone le go tokafatsa seemo sa itsholelo kwa malwapeng a bone.

“Re kgonne go nna le leruo, re tshuba ka metlakase, re duela metsi ebile re nna kwa ditsheng tsa rona tse re neng re sa kgone go di aga,” Mme Seiso a tlhalosa.

Ka bogodi bo setse bo iteleketse, ba tlhalosa fa ba tlhoka ba ba ka ba tlhatllamang gore ba sa le ba tshegeditse kgwebo mme sebe sa phiri ke gore, basha ga ba na kgatlhego. BOPA