03 Mar 2026

Banni bangwe ba  Palapye ba kopile puso go ruta ka kgotla ya ditsheko ya molao motheo le molao motheo ka kakaretso. 

Ba buile se kwa phuthegong ee neng e buisiwa ke Mothusa tona wa lephata la dikgaolo le tsa ngwao, Rre Ignatius Moswaane  kwa Palapye bosheng.

Mongwe wa banni, Rre Opelo Modimooaitse o kopile puso go rerisa le go ruta Batswana mo go tseneletseng  ka molao motheo.

Fa a akgela Rre Onalethata Letso o ne a supa fa a se kgatlhanong le go simololwa ga kgotla ya ditsheko ya molao-motheo mme a lemoga fa e ka thusa Batswana fela thata mme a dumalana le puso go e simolodisa.

O ne a supa fa ba ba senang madi a go itsheka ba ka ya gone kwa kgotla kgolo ya molao-motheo mme ba thusega.

Fa a ala kgang, Rre Moswaane o ne a tlhalosa fa a buisitse diphuthego di le mmalwa lefatshe ka bophara mme ka go tlhoka lesego, bangwe ba tsere letlhakore  kgatlhanong le kakanyetso ya go tlhoma  kgotla ya ditsheko ya molao motheo.

A re morero o puso e  lekodisang Batswana wa maikaelelo a go simolodisa kgotla ya ditsheko ya molao-motheo ga o tshwane le wa ditlhopho ko go ipatlelwang phatlha mme o tlhokana le kakanyo e le nngwe fela mo Batswaneng.

Rre Moswaane o ne a tlhalosa fa e rile ka ngwaga wa 2022, go nnile le pego ya lekoko le le neng le romilwe ke Tautona wa pele Rre  Mokgweetsi Masisi nako eo la go sekaseka molao-motheo wa lefatshe mme Batswana mo lefatsheng lotlhe ka bophara ba ne ba bua ka lentswe le le lengwe fela ba kopa gore ba tlhomelwe kgotla kgolo ya molao-motheo.

A re komiti eo ya re e ise e boele kwa go Tautona, ya re yone ga e bone go tlhomiwa ga kgotla kgolo ya molao-motheo go tlhokafala mme potso ya nna gore ba tsaya kae dithata tseo ka kopo eo e ne e tswa mo Batswaneng.

O tlhalositse fa kgotla ya ditsheko ya molao motheo e na le dithata di le dintsi tse di menaganeng. 

Mothusa tona o tlhalositse gape gore lekgotla tshekelo la molao motheo e le lekgotla le le tlhomiwang go sireletsa le go okamela molao-motheo wa lefatshe, go tolokolola le go tlhalosa ka fa o ntseng ka teng le gore ga gona epe kgotla ya ditsheko e e kwa godimo ga yone ka jalo fa e tsere tshwetso e tsere tshwetso. O ne a fa sekai ka kgang ya rre wa letso la Sesarwa yo o neng a nna dingwaga di le tharo kwa lefelong la setsidifatsi.

A re kgang ya ngwana wa rre yoo ya go batla go mo robatsa kwa lefelong le a tlholegileng kwa go lone e ne ya seka ya atlega kwa kgotleng kgolo ya boikuelo ya ditsheko mme fa kgotla kgolo ya molao-motheo e ka bo e le teng, o ka bo a ne a e fetisetsa teng gore e lebiwe sentle ka leitlho le le tseneletseng thata.

Rre Moswaane a re kgotla ya ditsheko ya molao-motheo e ka nna motshereganyi e bile e ka neela Batswana tshiamelo ka go na le Batswana ba le bantsi ba kopa dilo dingwe mme dikeletso tsa bone di sa diragadiwe.

O ne a tlhalosa kgang e bangwe Batswana ba reng puso e itebaganye le letlhoko la melemo le seemo sa thuto mme ba emise kgang ya mogopolo wa go simolodisa kgotla kgolo ya molao-motheo, a supa fa puso e tsweletse ka go itebaganya le diemo tsotlhe.

A re fa ba goroga mo pusong, ba gorogile ba fitlhela go na le seemo sone sa tlhaelo ya melemo le dipilisi mme puso ya felela e di ithekela, a supa fa mo nakong eno melemo le dipilisi di goroga mme di sa goroge ka bokete jo puso e batlang di goroga ka jone.

Dibui ka go farologana kwa phuthegong eo ba ne ba ntsha megopolo e e farologaneng ka maikaelelo a puso a go simolodisa kgotla ya ditsheko ya molao motheo. BOKHUTLO