02 Mar 2026

Modulasetilo wa khansele ya Bokone Botlhaba, Rre Mbaakanyi Smart a re go botlhokwa go rerisanya le metse e e amilweng ke tlhagogo ya bolwetse ja tlhako le molomo go simolola mephato.

E rile a etetse mafelo a a amilweng ke tlhako le molomo a go baakanngwang terata ya thibelo malwetse a leruo,

Rre Smart a re go a lebosega go bona morafe wa metse mengwe ya kgaolo ya Bokone Botlhaba e tshwaraganetse go lwantsha tlhako le molomo ka go baakanya terata e e senyegileng le go rema ditlhare.

O ba kopile go tswelela ba baakanya terata eo, go rema ditlhare mo terateng le go tswelela ba disa terata go koba dikgomo tse di tsamaelang gaufi le yone.

“Ha terata e senyega, mme goromente a tshwanelwa ke go batla madi a go e baakanya, e nna poelo morago ka madi ao a ne a ka dira ditlhabololo tse dingwe mo motseng,” ga rialo Rre Smart.

O ne a tlhalosa ha goromente a seegetse ko thoko madi a a kanang ka didikadike di le masome a hera bongwe le bosupa (P97 million) go lwantsha tlhako le molomo mme madi a, a kabo a dirisiwa mo ditlhabololong tse dingwe.

Rre Smart o ba lebogetse go ithaopa go tla go thusa go tsosolosa le go baakanya terata le go rema ditlhare tse di medileng ba dirisa ditsompelo le didirisiwa tsa bone.

“Maloba ha ke buisa phuthego ya kgotla ko Pole, ba ne ba tlhalosa ha go na le ko terata e seyong teng gotlhelele, mme e tsewa ke bangwe mo motseng ba ya go e dirisa go agelela masimo a bone,” ga rialo Rre Smart.

E rile a ba ema ka lefoko, molaodi wa kgaolo ya Bokone Botlhaba Mme Wame Samapipi a leboga baithaopi baa go bo e le batsaya karolo mo go lwantsheng tlhako le molomo.

O ba tlhaloseditse gore le fa ba ka tswa e se barui, bolwetse ja tlhako le molomo bo ka ba ama ka tsela nngwe o le modisa, mmereki ko madirelong a dijo tsa leruo kana ole mo kgwebong ya thekiso ya dijo. Mme Samapipi o ba akgoletse go bo ba ithaopile go nna batsaya karolo mo go sireletseng itsholelo ya lefatshe ba sa eteletsa pele go ka neelwa tiro ya sennela ruri.

“Ke eletsa re le metse ya kgaolo go tla ka tharabololo ya sennela ruri mo go tsa ditlamelo re lebeletse gore bolwetse jo bo tla kgapetsa kgapetsa, re lebeletse gore diterata di seka tsa senyega,” ga rialo Mme Samapipi. O ne a ba tlhalosetsa ha puso e lemoga gore mo seemong se sentseng jaana, ba tshwanetse go bo ba neetswe didirisiwa tsa itshireletso le tse dingwe jaaka dilepe mme go feletse go padile ka itsholelo e sa letle, ka jalo ba ithaopa go dirisa tsa malapa a bone.

Mme Samapipi o supile ha go se maleba go emela bolwetse go tlhagoga pele e bo e re morago go bo go simololwa go thibelwa ka go baakanya diterata le go disa kana go tlhatlhela dikgomo.

Mokhanselara wa Zwenshambe/Gambule/Gungwe Rre Tumelo Mhlambi o ne a lebogela tshwaragano e e supilweng ke baagi ba Zwenshambe morago ga go dumalana mo kgotleng go tla go baakanya terata e bile ba thusa ka madi go ithekela dijo.

O tlhalositse ha ba bangwe ba thusa ka dikoloi tsa bone go isa baithaopi ko lefelong le la go baakanya terata. BOKHUTLO