Bagolwane ba lephata la popo sesha ya magolegwa ba abetse lephata la baithuti ba ba-na-le bogole ba sekole sa Mahalapye Primary School tshingwana ya merogo, didirisiwa tse di phepafatsang le tse di tlhapang.

Ba dirile se bosheng mo Mahalapye morago ga bokopano jwa bone jwa malatsi a mararo jo bo tshwarwang ngwaga le ngwaga go sekaseka gore ba tsamaya jang mo tirong ya bone.

Fa  a rola dimpho tseo Mookamela dikgolegelo tsa Botswana, Rre Anthony Mokento, o tlhalositse fa tiro ya bone ese go disa magolegwa fela,  a supa fa  ba na le thulaganyo ya go thusa sechaba segolo jang ba ba tlhokileng lesego.  

A re ba tlhophile sekole seo ka jaana ba ne ba lemoga fa se na le letlhoko le lentsi ka go bona  bana ba ba-na-le bogole ba tlhoka ditlamelo tse di faphegileng.

Rre Mokento a re mowa o wa kutlwelobotlhoko le lerato ke moono o Batswana ba itsegeng ka one.  

A re go thusa baba tlhokileng lesego ga se gore motho o go dira ka gobo a na le gole gontsi ke sesupo sa lerato le bopelotlhomogi.

Rre Mokento a re o dumela gore bana baka dira botoka fa ba bona ba fiwa lerato e bile ba engwa nokeng mo dikgwetlhong tsa bone.

Rre Mokento a re bana ba  ba-na-le-bogole ba tlhoka go lemogiwa ba tshwana fela le bana ba bangwe ka dinonofo e bile ba lekana le bone ka ditshwanelo.

O tlhalositse gore fa bana ba ka itemoga gore ba na le bokgoni ba tsaya dithuto tsa bone ka tlhwaafalo basa itiewe ke sepe tsebe. 

 A re fa ba tsaya dithuto tsa bone tsia ba ka tsoga ba le maemong a a kwa godimo jaaka motho mongwe le mongwe.

Motshwarelela mogokgo wa sekole seo Mme Maipelo Monyatse o supile fa lekalana la ba-na-le-bogole le simologile ka ngwaga wa 2007, le tsaya bana ba ba-na-le-bogole ba Mahalapye le metse e mabapi.

Mme Monyatse a re lefa gontse jalo lekalana le ga lena ditlamelo tse di tsamaelanang le diemo tsa ba-na-le bogole.

Mme Monyatse a re  ba na le bana ba  ba-na-le bogole bale 59, basimane bale 37, basetsana bale 22 a supa fa ba itemogela matshwenyego a tlhaelo ya barutabana le sepalano.

A re bana le koloi e le nngwefela ee tsayang bana botlhe mo Mahalapye le metse ee mabapi a tlhalosa gore ke seemo se se dirang gore nako e bana ba rutwang ka yone e ne khutshwane thata.

O ne a kopa  bagolwane ba dikgolegelo gore ba ba rekele koloi  ya bobedi.

Fa a amogela dimpho mogolwane wa lephata la bana ba ba-na-le bogole Mme Bolokang Passman o ne a lebogela dimpho, a re  di tlaa ba thusa thata, a tlhalosa gore bana ba rutwa le ditiro tsa diatla jaaka go lema, go roka le tse dingwe.

Mme Passman a re dithuto tsa ditiro tsa diatla ke tsone tse ba dikgonang thata ebile dika ba betlela bokamoso.

O boletse fa ba tlhaelelwa ke didirisiwa selo sese dirang gore tiro ya bone e nne bokete. 

Mokhanselara wa kgaolo ya Mahalapye Bokone Rre Emanuele Saakane o ne a lebogela ba dikgolegelo tiro entle e ba e dirileng.

 Rre Saakane a re ga ba ipona tsapa mo nakong e thata ya leshekere la madi ba ntsha ga bofelo ba thusa lekalana la ba-na-le bogole la sekole sa Mahalapye, a kopa gore botsalano joo bo tswelelepele. BOKHUTLO