03 Feb 2026

Banni ba kgaolo ya Tutume ba rotloeditswe go dira ka gotlhe go thibela go ka tsenwa ke bolwetse jwa letshoroma.Kopo e e dirilwe ke modularities wa khansele ya kgaolo ya Tutume bosheng fa a ne a supa fa go tlhagogile bolwetse jwa letshoroma kwa metseng ya Maitengwe le Dukwi.
Modulasetilo Rre Tabona Masole o boleleletse forego ya khansele e e faphegileng fa kwa Maitengwe go kwadisitswe balwetse ba le 31 fa kwa Dukwi go begilwe ba le babedi.
Rre Masole a re ka lesego balwetse bao ba kgonne go thusiwa ka jaana melemo ya bolwetse joo e teng mo dikokelong, fa se se seyong mo nakong ya gompieno e le matloa a monang a a ka abelwang batho go itshireletsa.
Rre Masole a re kgaolo ya Tutume ke nngwe ya dikgaolo tse di nnang di amiwa ke tlhagogo ya bolwetse jwa letshoroma.
Ka jalo, o kopile makhanselara a kgaolo eo go tsibosa setshaba ka tlhagogo ya bolwetse joo,le go sala morago melawana ya ba botsogo e akaretsa wa phepafatsa tikologo e ba leng mo go yone go itsa monang go tsalela foo.
O ne gape a kopa setshaba go bona ba bongaka fa ba ka itemogela dikai tse di tsamaelanang le bolwetse joo.
Mothusa-tona wa lephata la botsogo, Rre Lawrence Ookeditse yo a neng a tsere karolo mo phuthegong eo, o ne a tsibogela selelo sa makhanselara ka mosuke kwa kokelong ya Tutume fa thulaganyo ya go aga kokelo eo e tlaa tswelela fa madi a ka nna teng.
Rre Ookeditse o kopile makhanselara go nna le seabe le boikarabelo mo dikgannyeng tsa botsogo, a bo a ba rotloetsa go sala tsamaiso morago fa ba nale ngongorego epe ka ditirelo tsa botsogo.
A re baeteledipele ba tshwanetse ba tlogela go supasupana ka monwana, mme boemong jwa seo, ba tle ka dikgakololo le megopolo e e ka dirisiwang go tokafatsa dikgang tsa botsogo.
O kgadile banni bangwe ba go bolelwang fa ba dirisa matloa a bone a monang go tshwara ditlhapi.
Rre Ookeditse a re ngwaga ono dipula di nele ka bokete ka jalo a kopile batho go leka ka bojotlhe go itshireletsa le go ipabalela mo bolwetseng joo jwa letshoroma le a mangwe.
Gape mothusa tona o kgadile mokgwa wa bangwe mo setshabeng wa go kgokgontsha badiri ba botsogo, mme o ne a rotloetsa tirisanyo mmogo, tlotlo, lorato le tshwaragano ya botlhe. BOKHUTLO