02 Feb 2026

Go rutuntsha setshaba go tseneletse go ka fa Batswana sebaka se se ntle sa go ka atla mogopolo kgotsa go o gana ba phutholotse mahatlha.Se se boletswe ke Kgosi Johane Lesomo wa Ramatlabama fa a ne a akgela kwa phuthegong ya patlo maikutlo mo go tlhameng kgotla ya molao-motheo wa lefatshe e e neng e buisiwa ke Tona wa lephata la pereko le selegae, Major General Pius Mokgware kwa Good Hope ka Labotlhano.
Kgosi Lesomo a re gantsi mo dithuto-puisanong dingwe tsa bogosi, go atle  go supege go thulana ga molao mo go tsa ngwao, ditshwanelo tsa setho le sedumedi.
 “Keletso le kgakololo yame ke gore go tsewe nako e ntsi go rutuntsha Batswana ka kgotla ya molao-motheo”, ga kopa Kgosi Lesomo.
Kgosi Thabo Mathiba wa Mmathethe a re tshekatsheko ya go dira kgotla ya molao-motheo ke kgang e e yang go fetola matshelo a Batswana, ka jalo, a re go tlhokega gore magosi a nne le kitso e e tletseng le morero ka dikgang tsa mofuta o.
 O ne a supa matshwenyego a gore go lebega marara a saletse kwa morago mo morerong wa kgotla ya molao-motheo.
 A re go tshwanetse gore molao le kgotla ya molao-motheo tse di sekasekiwang di akaretse go baakanyetsa bogosi le melao ya Setswana, a re dikgosi di tshwanetswe go busediwa dithata mo molaong. A re kgang e, e emelwe ka dinao ka jaana bogosi bo gateletswe.
Mongwe wa ba-tsena phuthego Rre Francis Mokoto a re go ka nna molemo fa tshekatsheko e ka lemoga le go busetsa magosi dithata ka jaana go sa itumedise ka fa ditsamaiso tsa molao wa lefatshe di dirwang ka teng.
Mme Gokatweng Separa o atlile mogopolo wa tshekatshetsheko molao motheo , a re dikgang tsa boswa di tlhokisa magosi boroko, mme go tlhoka gore go nne le ka fa molao o ka thusang go di tshereganya ka teng.
Mme Separa o ne a atla mogopolo wa gore tsamaiso ya kgotla ya molao-motheo e tsile go tlhofofaletsa Batswana go itsheka.
A re seemo sa go itsheka kwa makgotleng a ditsheko se baya ba ba dikobo dikhutshwane ka fa mosing.
Bangwe ba banni ba re e re le ntswa ba amogela mogopolo wa go dirwa ga kgotla ya molao-motheo, ba eletsa gore mogopolo o emisiwe pele ka mabaka a gore go lebaganwe le go tokafatsa seemo mo mhameng wa botsogo le kgang ya temo go direla lefatshe leno dijo.
Fa a tsibogela matshwenyego a morafe, Tona Major General Mokgware o tlhaloseditse morafe gore puso e na le thulaganyo ya tse di tlang pele segolo jang botsogo jwa setshaba, jo e leng matshwenyego a ba le bantsi.
O rotloetditse setshaba go emela pego ya setshaba ya madi kgwedi ya Tlhakole e le boferabongwe go bona tse di rulagantsweng ke puso go tla pele mo lenaneong la tiriso ya madi go ya ka letlhoko la tsone.
 O ne a tlhomamisetsa morafe fa go na le baitsaanape ba e leng Batswana ba ba ithutetseng dikgang tsa melao-motheo.
O supile fa kgang ya bogosi mo molaong e le nngwe ya dikgangkgolo tsa kgotla ya molao motheo. A re le ntswa thulaganyo ya go begela magosi kwa ntlong ya dikgosi e dirilwe, a re tsholofelo e ne ele gore magosi a tlaa rerisa barwarrabone. Le fa go ntse jalo o tshepisitse fa a tlaa e tsaya mhago mabapi le go e sekaseka go ya pele. BOKHUTLO