21 Jan 2026

Lephata la metsi le kgonne go tlhatswa didiba di le lesome le botlhano mo kgaolong ya Tswapong North.
Fa a buisa phuthego ya kgotla kwa Seolwane bosheng, Mopalamete wa Tswapong North, Rre Prince Maele a re o ne a kopa lephata la metsi go phepafatsa didiba tseo morago ga go lemoga fa mealo ya ditshipi tse di anamisang metsi di setse di le dikgologolo ka jalo di thubega kgapetsa kgapetsa.
Mo go tse dingwe, o rotloeditse banni ba Seolwane go duela dikoloto tsa metsi ka lephata la metsi le atolositse tuelo ya dikoloto go fitlhella kgwedi ya Tlhakole e ya fifing.
Se a re se direletswe gore botlhe ba ba kolotang metsi ba kgone go duela.
“Dikereke le mekgatlho e e ikemetseng ka nosi le yone e kgona go akola lenaneo le la go fokotsa dikoloto tsa metsi.”
Fa a tswa la gagwe, Kgosi Baikanedi Ramanjane o kopile mopalamente go ba thusa ka kgang ya kgosi wa Seolwane.
O supile fa leina la kgosi le sale le ntshitswe ke morafe, jaanong ba santse ba letile go itse gore kgang ya go tlhoma kgosi e tsamaya fa kae.
“Tsamaiso ya lekgotla la rona ya re babalela ka gore re ya kwa Lerala kana Maunatlala go kopa dithuso tsa lekgotla,” ga tlhalosa Kgosi Ramanjane.
O supile fa banni ba Seolwane ba nyoretswe go etelwa ke matona a mangwe go tla go ba lekola e bile ba itseele ka tsebe tsotlhe tse di ba tshwenyang.
Kgosi Ramanjane o tlhalositse fa lephata kabo ditshaba le sale le aba ditsha mo Seolwane bogologolo.
Mme a re seemo se, se a tshwenya ka bana ba tlhoka fa ba ka ikagelang teng gore ba sute mo malwapeng a batsadi ba bone.
O tladitse ka gore go abela batho ditsha go ka tila kana ga fokotsa dintwa tsa malwapa. BOKHUTLO