28 Nov 2025

Tona wa Ditswa-mmung le Kgotetso, Mme Bogolo Kenewendo o tlhaloseditse  banni ba Mahalapye fa go epa motlhaba ntle le teseletso e le molato o motho a ka o sekelang.

Erile a araba matshwenyego le dilelo tsa banni ba motse wa Mahalapye mabapi le kepo ya motlhaba mo nokeng ya motse oo mo phuthegong ya kgotla bosheng, Mme Kenewendo a re ka tshwanelo, ope fela yo o epang motlhaba o tshwanetse a nne le teseletso ya go dira jalo.

“Re a itse gore go ntse go na le mathata mabapi le kepo ya motlhaba mme ebile a setse a tshwenya le gore fa re sa sireletse tikologo ya rona seemo se tlaa bifela pele,” ga bua Mme Kenewendo.

A re ba dumalane go emisa go ntsha diteseletso tse disha tsa go epa motlhaba mo motseng wa Mahalapye.

“Re itse gore motlhaba o a tlhokwa mme re santse re sekaseka seemo mo dinokeng tse dingwe. Re tshwanetse go babalela noka e ya Mahalapye,” ga bua Tona.

A re ditshekatsheko tsa bone di supile fa noka e na le fa e epilweng thata teng mme e baya banni ba motse ka fa mosing ka jaana bangwe ba na le meraka kgotsa masimo gaufi le yone.

Tona a re go supa fa noka e setse e oketsegile mme e le diphatsa segolo bogolo mo nakong e ya dipula.

“Re lemogile gape fa go na le didiba mo nokeng mme re tsere tshwetso ya gore re busetse ditanka tsa metsi mo metseng go ka thusa balemi barui segolo thata ba didiba tsa bone di sentsweng ke kepo  ya motlhaba mo nokeng,” ga bua Mme Kenewendo.

Tona o tsweletse ka go supa fa ba file dikompone di le nne fela diteseletso tsa go epa motlhaba a re ga gona ope o o filweng teseletso e ntšha.

Ka jalo Mme Kenewendo o kopile banni ba motse go tshwaragana nabo mo twantshong borukutlhi ya baepi ba motlhaba ba ba senang diteseletso a re ba tseye boikarabelo ja go tsibosa ba sepodisi fa ba belaela lomepe. 

Tona o ne a itsese morafe ka ditshutiso (amendments) tsa molao tse ba di dirileng bosheng ka tsamaiso ya meepo le ditswa-mmung tsa lefatshe la Botswana.

“Re itebagantse le kafa e leng gore meepo e tla bo e bereka ka teng le metse e e mabapi re lebile ditlhabololo le kgodiso ya itsholelo mo metseng eo le lefatshe ka kakaretso,” ga bua tona.

O ne a tswelela ka gore ba batla thata go rotloetsa Batswana go tsena mo kgwebong ya tsa meepo ya ditswa-mmung.

A re ba batla gape go tlhomamisa gore didirisiwa tsotlhe tsa meepo di rekisiwe mo lefatsheng la Botswana mme ebile keletso e le gore fa go na le ba dikgwebo tseo kwa ntle ga lefatshe ba bule madirelo mo Botswana.

A re ba na le keletso ya gore le Batswana ba bule madirelo ao go tsenya dithuto tsa bone tsa tiro ya diatla mo tirisong ka go itirela didirisiwa tsa meepo.

Tona a re se se ka tlhama mebereko mme ebile sa jwala mowa wa boipelego.

“Ntlha e nngwe ke gore re batla go netefatsa gore botlhe ba dikgwebo kgotsa dikompone tsa meepo ba baakanye fa ba setseng ba epile teng morago ga go tsaya ditswa-mmung. Se e tlaabo e le tsela nngwe ya go busetsa tikologo mo seemong go ka dirisiwa ke ba temo thuo fa go kgonega e sa kgotlelesega.” ga bua Mme Kenewendo.

Tona a re ba batla go bona gore go na le ditswa-mmung dife tse di ka epiwang go ka bula dikgwebo tsa meepo.

A re ba eletsa gore merafe ya metse ya Botswana e tseeletse dikgwebo tse tsa kepo ya ditswammung ka go farologana go itsa gore lefatshe la Botswana le ikaege ka teemane fela. ENDS