28 Nov 2025

Tona wa Lephata la Ofising ya ga Tautona, Rre Moeti Mohwasa a re go botlhokwa go tsaya ka tlhwaafalo maiteko a dikereke di a dirang go tlhabolola setshaba.

Rre Mohwasa o buile jalo bosheng jaaka a ne a simolodisa semmuso dikago tsa kereke ya Saint John Apostolic Faith Mission of Botswana mo Selebi Phikwe.

A re go tswa goo lowe, kereke e supile fa e le modi wa setshaba, kwa batho ba bonang kgomotso teng ka nako ya dipitlagano le dikgwetlho ka go farologana, a supa fa dithuto tse di amogelwang di sidila maikutlo e bile di thusa go aga setho se se eletsegang.

Ka jalo a re go botlhokwa gore dikereke di fiwe kemonokeng le tlotla ee maleba gore badiredi mo go tsone ba tswelele ba dira tse dikgatlhang, di na le bokao e bile di totomatsa kereke.

Rre Mohwasa o supile fa maiteko a maloko a kereke ya Saint John Apostolic Faith Mission of Botswana a go aga kereke e le kgatelopele e e kgatlhisang ee supang fa ba intsha setlhabelo go netefatsa gore lefelo la bone la kobamelo le mo seemong se se amogelesegang e bile se kgatlhisa. 

O kopile ba-na-le seabe ka go farolgana go tswelela ba ntsha dithuso ka go farologana tse di ka fefosang kago ya kereke eo.

Rre Mohwasa o ne a ntsha P10 000, se e le bontlha bongwe jwa koleke le kemo nokeng e a e fang maloko a kereke eo.

Rre Mohwasa gape o rotloeditse maloko a kereke go tswelela ba supa bokao jo bo eletsegang mo setshabeng, a re seba se rerang kgotsa ba se bua se nyalane le ditiro tsa bone kwa ntle ga kereke gore setshaba se tseye malebela.

Ba kereke ya Saint John Apostolic Faith Mission of Botswana ba supile fa ba simolodisitse lenaneo la motho le motho kgomo, se e le maikaeleo a go kokoanya madi le dithuso tse di ka rotloetsang katlego ya kago ya kereke eo. ENDS