28 Nov 2025

Mongwe wa ba batshelang le mogare wa HIV/AIDS mo Lobatse Mme Kelebogile Marope wa dingwaga tse di masome a matlhano le bone a re go bo go sa dirwe dithuto tsa botsogo mo dikokelong le mo dikokelwaneng moso le moso go dira gore dipalo tsa batho ba ba tsenwang ke mogare di gole.

Mme Marope o buile jalo bosheng mo potsolotsong le BOPA a bolela gore dithuto tseo di ne di thusa thata nako ya di dirwa ka jaana balwetsi ba ne ba fana maele, ba rotloetsana ka tsa botsogo, a re nako eo go ne go rutwa thata gore o ka tshela jang le mogare, gore o itlhokomela jang le gore o je dijo dife. O tlhalositse gore go ja sentle go mo thusitse go tshela le mogare a se mo kalafing ka masole a mmele a ne a le kwa godimo.

Mme Marope o tsweletse a bolela gore mo dithutong tseo bane ba botsa dipotso ka tsa botsogo, go tlhaloganya mo go tseneletseng ka seemo sa mogare le bolwetsi jwa AIDS, a tlatsa ka gore mo nakong eno mogare o gaketse ka gore batho ga ba ikgaphe, ga ba itshireletse fa bangwe le sekausu ba sa se dirise sentle. O tsweletse a re bangwe ba santse ba itlhabelwa ke ditlhong ka jalo ga ba ise ba ikamogele, mme selo se se dire gore motho a tlodise ditlhatlhobo tsa gagwe le gone go nwa melemo tota, a tshaba matlho a batho.

A re mabaka mangwe a a dirang gore mogare o gakale ke tiriso botlhaswa ya nnotagi e a reng e tlhokisa batho boikarabelo ka jalo ba tsene mo diphatseng tsa go tsenwa ke mogare o wa HIV. 

Mme Marope a re e nngwe kgang ke gore mo malwapeng ga go kgalemelwe bana go bipiwa mpa ka mabele, a afa sekai gore monna o kgona go dirisana le ngwana le mmaagwe mo go tsa tlhakanelo dikobo a ntse a tshela ka mogare mme go nne motlhofo gore mogare o fetele kwa ngwaneng .

O tsweletse a bolela gore go nale dikgwetlho di akaretsa go sa nneng teng ga baoki , go sa thuse molwetsi ka nako dingwe, seo se dire gore molwetsi a boe a sa tsaya melemo, mme a tlodise go nwa melemo mo gongwe a tlogelele ruri go tsaya melemo.

Mme Marope a re tlhaloso kwa dikokelong ga yaa lekana bogolo jang fa motho a neelwa dipilisi tse di sa tshwaneng le tse a di tlwaetseng ka mmala kgotsa ka modiro a tlatsa ka gore golo moo go dira gore batho ba tlodise gonwa melemo, ba sa tlhaloganye, kgotsa ba tsietsega, ntswa seo se bakwa ke go bo melemo e dirwa ke dikhamphani tse di farologaneng.

Mo go tse dingwe o boletse gore mo nakong ya gompieno ba fiwa dipilisi tse dinnye ka palo tse di dirang gore motho a ye kokelong ga ntsi fa bangwe bone ba itsapa mme ba felele ba tlogela kalafi ya bone.

O kopile puso go thusa ka melemo gore e nne teng go itsa dintsho tse di amanngwang le mogare HIV/AIDS.

Molomaganya ditiro kwa lekalaneng le le ikemetseng la Re Na Le Seabe, Rre Oaitse Pelaelo a re ba ruta le go thusa banana ba dingwaga tse di lesome go ya ko go tse masome a mabedi le bone ka go ikgapha le go thibela go ka tsenwa ke mogare wa HIV/AIDS le malwetsi a a sa tshelanweng.

 O tlhalositse gore banana ba eletsa go dirisa lenaneo la pilisi e e fokotsang kgonagalo ya go tsenwa ke mogare (PREP) jaanong kgwetlho ke gore ba nna mo moleng o le mongwefela le batho ba ba tsayang diritibatsi tsa ARV mme seo se ba tlhabise ditlhong, ba tlogele go tsaya dipilisi tseo mme seo se ba tsenye mo diphatseng tsa go tsenwa ke mogare. A re banana ba ba supa fa ba eletsa nkabo go nale ko ba tseelang pilisi eo teng ba le nosi.

O tsweletse a bolela gore pilisi eo e dirisiwa ke motho ope fela yoo senang mogare mme a bona gore o ka nna le kgonagalo kgotsa bodiphasa jwa go amiwa ke mogare wa HIV/AIDS a re e ka dirisiwa gape ke bao ba ba “gwebang” ka mmele, le motho yo mokapelo wa gagwe a leng mo kalafing ya ARV. ENDS