25 Nov 2025

 Banni ba meraka le masimo kwa tikologong ya Tshimoyapula bogolo jang balemi-barui ba latofatsa ba bapadi ba phane ka go nwa metsi mo didibeng tsa bone ntle le tetlelelo.

Fa a bua kwa phuthegong e e neng e buisiwa ke komiti ya Tshimoyapula Conservation Trust bosheng, Rre Benjamin Phole mongwe wa beng ba didiba o kaile fa ba bapadi ba phane ba ba  neng ba kampile go bapa le didiba, ba ne  ba utswa metsi e bile ba tlogela ditereta tsa masimo a bone di kgautlhane.

 Rre Phole  a re mo maitekong a bone go buisanya le babapadi bao, go ne ga tlhoka kutlwisisano ka jaana ba ne ba sa supe boikotlhao.

   Ba boletse fa bontsi jwa babapadi ba ne ba tswa kwa khutlong tsotlhe tsa lefatshe leno bangwe ba na le diteseletso fa bangwe ba ne ba sena tsone. 

O tlhalositse fa  motho a le mongwe a ne a kgona go tla le batho ba feta masome a mabedi a bo a ba tlogela mo sekgweng go  bapala phane.

A re se se utlwisang botlhoko ke gore bangwe ba ne ba e baya botsetse, ba e bapala e santse e le nnye fa bangwe ba e emela gore seboko se thube. A re sekgwa se makgasa ka ba remile maphane.

Rre Phole a re leruo la bone bogolo jang dikgomo ka  bontsi di sena boleng di sa rekisege ntateng ya bolwetse jwa Mabele jo bo fitlhelwang mo go tsone.

Ka jalo morafe o tsile ka mogopolo wa go laola seemo se se tshwanang sa ngogola go leka go hema mathata.

Ba tlhalositse gape fa kwa mafelong a go bapalwang teng go rekisiwa phane ka go ananya dilo ba re bareki ba tlaa ka dijo, metsoko, majalwa, diaparo tse di kgologolo ba tsaya phane, mme se se makaditseng bontsi le mapodisi ke gore bangwe basetsanyana ba ne ba ananya phane ka tlhakanelo dikobo.

Modulasetilo wa komiti ya Tshimoyapula Conservation Trust, Rre Onalenna Nkgabo, o boletse fa ba filwe boikarabelo jwa go laola di-tsa-tlholego tse di mo mafelong a bone sentle.

Rre Nkgabo a re ba na le moakanya wa gore ba bue le ba didiba gore ba tlhome di Campsites tse di duelwang mme e bile go na le matlwana a boiteketso.

Go nne le dikomiti mo thoteng nngwe le nngwe ba ba tlaa bong ba lebeletse gore ba bapadi ga ba bapale fela ba sena diteseletso le gore dipalo di lekane lefelo leo, ditlhare ga di remiwe, leswe le ba le ntshang mo phaneng ba bone gore ba le baya sentle le go latlha ka tsamaiso gona le go le tlogela fela jaaka ngogola.

Babapadi ba tshwanetse go ya go itshupa le go ikwadisa kwa kgotleng ya Tshimoyapula le dikoloi tsa bone. 

Ba seka gape ba tlhatswetsa mantle a phane mo megobeng.

Ba akanya gore Trust e dire tuckshop go ba rekisetsa e seng go emela go ananya e bile ba akanya gore mo lebakeng le le tlang, ba dire warehouse ya Trust ba reke phane ba e beye gore batho ba reke mo go bone golo go le gongwe.

Banni ba eletsa ba bapadi ba ka thapa bana ba motse go ba bapalela phane ba bo ba duelwa ka madi aa botoka

Ba re go seka ga letlelelwa bana ba dingwaga tse di kwa tlase go ya phaneng ka gore ba sepodisi ba boletse fa go nnile le ditsheko tse dintsi tsa petelelo kwa sekgweng.

Gape ba boletse gore go nne le nako e e siameng e rebotswe ke ba lephata la tshomarelo dikgwa ka nako ya go bapala le go ema.

Ba re yoo tlaa tshwarwang a bapala phane a sena teseletso, e gapiwe a bo a kobiwa gone foo mo lefelong leo.

Ba re ngogola go ne go le maswe thata mo banni ba neng ba kopa thuso kwa molaong le molaodi ka seemo se seneng se sa laolesege.

“Batho ba le bantsi bangwe ba tla ka megobagoba ya dikoloi ba gogoba phane fela e nnye le e e siameng ba bo ba tsamaya,”  mongwe wa banni a tlhalosa.

Ba re go ne go ratholwa majawa a Setswana e bile go letswa mo sekgweng, seemo se ba kaileng fa se ne sesa siamela botsogo jwa leruo la bone. ENDS