25 Nov 2025

Batswana ba rotloeditswe go lema ditlhare ka di na le mosola e bile di le botlhokwa mo matshelong le mo tikologong.

godimo ga moo di thusa mo go tsa botsogo ka kalafi.

Fa a bua ka letsatsi la go lema ditlhare kwa kgaolong ya Tsabong bosheng, mothusa molaodi kwa kgaolong ya Tsabong Mme Maitumelo Maemo o ne a tlhalosa fa ngwaga ono lefatshe leno le ipelela dingwaga tse di masome a mane tsa temo ya ditlhare morago ga go simolodisiwa ke tautona wa pele Sir Ketumile Masire ka ngwaga wa 1985.

 Mme Maemo o ne a tlhalosa fa letsatsi la temo ya ditlhare lefatshe ka bophara le tlaa ketekwa kwa Kuke kwa kgaolong ya Ghanzi kgwedi eno e le masome a mabedi le boherabobedi. 

O supile fa seemo sa phetogo ya loapi mo kgaolong ya Kgalagadi se na le manokonoko le matshosetsi mo tikologong ka go nna le mogote le serame se se feteletseng tse di felelang di baka leuba le gone go ama matshelo a batho le diphologolo. 

Mme Maemo a re ka jalo, se gwetlha puso le setshaba ka kakaretso go dira gotlhe mo go tlhokafalang go tlhokomela tikologo.

 O ne a supa fa setlhogo sa ngwaga ono sa: Dikgwa le Dijo, se le maleba ka ditlhare e le tsone tse di ntshang maungo a e leng one dijo tse Batswana ba tshelang ka tsone.

A re maungo a tshwana le moretlwa, motlopi le sone semela sa sengaparile le tse dingwe tse di fitlhelwang mo kgaolong ya Kgalagadi le tse dingwe jaaka maboa le moretologa tse di fitlhelwang mo dikgaolong tse dingwe mo lefatsheng leno a tswa mo ditlhareng a tlatsa ka gore mangwe a dirisiwa e le kalafi ya malwetsi a a farologanyeng.

Mothusa molaodi o boletse fa ngwaga ono ba lephata la dikgwa le dibapalwa nageng le makalana a mangwe ba tsere tshwetso ya go rotloetsa go lema setlhare sa Motsentsela se se bonwang thata kwa kgaolong ya Bokone kwa Maun le Chobe.

O ne a supa fa e le setlhare se se nnang se le setala e bile se kitlane ka nako tsotlhe go thusa go kapa phefo e e siametseng gore batho ba e heme le gone go fokotsa mogote o montsi. 

O kaile fa se na le moriti o o tlhokwang ke batho ga mmogo le diphologolo.

O boletse fa se ka siamela kgaolo ya Kgalagadi ka e le mogote thata ka nako ya selemo e bile se ka itsetsepela kwa kgaolong eo e e leng motlhaba, a supa fa go le botlhokwa go lema ditlhare tse di farologanyeng ka di nonotsha lefatshe gore le siamele temo le gone go sireletsa kgopho ya mmu (soil erosion) e e bakwang ke metsi le diphefo.

Fa a bua ka setlhare sa Sexhanana se se fitlhelwang kwa kgaolong eo, Mme Maemo o boletse fa banni ba Bokspits, Rapplespan, Vaalhoek le Struizendam (BORAVAST) ba ne ba ipopa go dira Trust e le tsela nngwe ya go dira magala ka setlhare se go itshetsa le gone go tsosolosa mahudiso mme e bile a re seo se tsamaelana le setlhogo sa mono ngwaga.

O ne a supa fa kwa Tsabong ba Lephata la Temo ya Ditlhare ba setse ba jwadile ditlhare di ka nna 132 mo dikgaolwaneng tse thataro, dikereke di le lesome le bobedi, matlo a VDC,  lefelo la matlhabelo, mo ditseleng, mabala le mafelo a mangwe jaaka mapalamelo a dikoloi tsa setshaba ka jalo a re ke boikarabelo jwa mongwe le mongwe go tsenya letsogo gore maduo a bonale.

A re le ntswa kgaolo eo e na le kgwetlho ya metsi go tshwanetse gore banni ba ithute mothale o mongwe wa go somarela metsi bogolo jang fa dipula di na gore ba kgone maikaelelo le maitlamo mo temong ya ditlhare, a tlatsa ka go supa fa ditlhare gape di fetola tebego ya metse le gone go kgatlhisa leitlho la baeng.

Fa a bua maikaelelo a letsatsi la temo ya ditlhare molomaganya ditirelo mo lephateng la dikgwa le dibapalwa nageng kwa kgaolong ya Kgalagadi Rre Lesika Basalumi o ne a tlhalosa fa le itebagantse le go ikgakolola le go rotloetsa Batswana go tswelela ba lema ditlhare ka di le botlhokwa mo matshelong a bone ka go ntsha dijo, tsa botsogo, moriti le gone go thusa go hema phefo ya tsone e e phepa. Rre Basalumi o tlhalositse fa maikaelelo gape e le go abelana maele le dithuto ka fa di tlhokomelwang ka teng gore setshaba se kgone go akola maduo a tsone le gore di ka tlhabolola le go tokafatsa matshelo ka go itshetsa ka tsone ka methale e e farologaneng.

O ne a rotloetsa setshaba go tlhokomela ditlhare bogolo jang tsa mo nageng, go di bapala ka kelotlhoko gore le dikokomane tse di tlang ba di fitlhele.

A re go ya ka maitemogelo a gagwe banni mo kgaolong ya gagwe ba sa ntse ba tsaya temo ya ditlhare ka tlhwaafalo ka malwapa ka bontsi ba di lemile e bile gape bangwe ba inaakantse le dikgwebo tsa tsone go itshetsa.

Mme Keromemang Ntau yo o dingwaga tse di masome a marataro le boherabongwe (69) wa motse wa Kisa mo kgaolong eo o ne a supa fa a tswa kgakala a itshetsa ka temo ya ditlhare tsa mekgabisa le meriti mme kgwebo ya gagwe e dira sentle thata bogolo jang ka nako ya manyalo le ditiro tsa puso tse di farologanyeng.

Kgosi David Toto ll fa amogela ba tsena moletlo o ne a ba rotloetsa go tswelela ba lema ditlhare tse di farologanyeng di akaretsa le tsa kwa sekgweng go di lema mo malwapeng le tse di tswang mo dikgaolong tse dingwe e le tsela nngwe ya go di somarela le gone go fetola tebego ya metse ya bone. ENDS