Makhanselara ba kgaolo ya Palapye ga ba itumelele ka fa paakanyo ya dikago tsa sekole se segolwane sa Moeng College e neng ya tsamaya ka teng mo go feletseng rakonteraka yo o neng a thapilwe go baakanya dikago tseo a neng a tsena ka lenga la seloko a ise a wetse tiro.

Makhanselara ba ne ba akgela mo pegong e e neng e rolwa ke mogolwane go tswa kwa lephateng la dikago, Mme Lorato Ditiro yo o neng a ba lekodisa ka dipaakanyo tsa sekole sa Moeng College kwa bokopanong jwa khansele ya Palapye bosheng. 

Ba ne ba kgala ba sa kgwe mathe ka fa bodiredi jo bo neng bo tshwanelwa ke go dira tiro ya paakanyo ya sekole seo bo neng jwa goga dinao ntswa konteraka eo e ne e dira tiro e ntsi thata kwa sekoleng e bile e dirwa ka madi a mantsi. Makhanselara ba re bodiredi bo tshwanetse bo tlhoafale fa go dirwa ditiro tsa setshaba mme madi a seka a wela mo motlhobodikeng jaaka tiro ya kwa sekoleng sa Moeng College e tlogetswe e sa wela mme go dirisitswe madi a mantsi.

Ba ne gape ba kopa gore kgang ya rakonteraka yo o neng a dira tiro kwa sekoleng seo e isiwe kwa go ba ditlhotlhomiso gore ba tlhotlhomise gore go ka tswa go diragetse eng.

Ba ne ba kopa lephata leo go bona gore go baakanngwa dikago tse baithuti ba nnang mo go tsone ka di se mo seemong se se siameng.

Tiro ya go baakanya dikago tsa sekole seo e ne ya simolola ka kgwedi ya Seetebosigo ka ngwaga wa 2022 mme e ne e solofetswe gore e tla a wela ka ngwaga wa 2023 ka kgwedi ya Sedimonthole mme ya re go ntse go tsweletse ga nna le ditiego tse di neng tsa dira gore go felele go dumalanwe gore tiro eo e wele ka ngwaga wa 2024 ka Sedimonthole. E ne e dirwa ka madi a selekanyo sa P100, 396, 390.00

Tiro ya go baakanya le go shafatsa sekole seo e ne e akaretsa paakanyo ya matlo a badiri ba sekole, bonno jwa baithuti, matlo a borutelo, dikago tse dingwe tsa sekole le go itebaganya le go tsamaya ga metsi le tse dingwe.

E ne e rile go le pele fa a lekodisa makhanselara, a supa fa ba ne ba nna le dikgwetlho fa ba tsweletse le tiro ya go baakanya dikago tsa sekole seo di tshwana le tsa go tlhoka madi a mosepele wa go ya kwa sekoleng sa Moeng College go ya go leba gore tiro eo e tsamaya jang mme se sa dira gore ba nne nako e ntsi ba le kwa ba direlang teng kwa Gaborone ba sa bone tiro eo kgapetsa kgapetsa.

Mme Ditiro o ne a supa fa e rile ngwaga ono ka Ferikgong rakonteraka a ntsha tse a neng a di dirisa go baakanya dikago tsa sekole seo mme a phuaganya tiro e a neng a e dira ka jalo ba mo neela mokwalo o o neng o supa fa a ne a sa tshwanela go dira jalo, mme yare ka Mopitlo ba ema ka dinao go bona gore ba kgaogana jang le ene ba setse molao morago.

A re e ne ya re ka Lwetse ba kgona go kgaogana le rakonteraka yoo ene mme morago ba mo mo kwalela gore ba kopane le ene go ya go leba kana go seka seka gore ke mang yo o kolotang yo mongwe mme rakonteraka a supa fa a ka seka a kgona go kopana le bone.

Mme Ditiro o ne a re maikaelelo a bone ke gore ka ba kgaogane le rakonteraka yoo, ba lebe ditshenyego tse di leng teng tse di batlang madi e bile di batla go baakanngwa ka bonako mme ba dirise ba ofisi ya bone go di dira, tse ba sa kgoneng go di dira ba laletse boradikonteraka ba gaisanye go feleletsa tiro e pele ga ngwaga wa madi o wela. BOKHUTLO