24 Nov 2025

Mopalamente wa kgaolo ya Lentsweletau/Lephepe, Rre Tshenolo Bogatsu a re kakanyo ya gore go inaakanya le metshameko le bodiragatsi ke go diela bana sebaka sa go ithuta, itloso bodutu kana dilo tsa bonyana fela ke go tlhoka tebelopele.

O buile jalo mo potsolotsong kwa dikgaisanong tsa lebelo la monna iteke (2025 National Cross-Country Championships) le le neng le rulagantswe ke lekgotla la mabelo la Botswana kwa Kopong bosheng.  

Maikaelelo a lebelo e ne e le go tlhopha setlhopha sa batabogi se se tla yang go iteisana borathana le balekane ba bone kwa dikgaisanong tsa mafatshefatshe tsa 2026 World Athletics Cross Country kwa California, America.

Ka jalo Rre Bogatsu o kopile banana go inaakanya le metshameko le go sala morago dikitso tse di faphegileng tse ba nang le tsone di akaretsa bodiragatsi gore ba itlhotlhore lehuma le le bakiwang ke go tlhoka tiro.

A re o itumedisitswe ke go bona banni ba Kopong ba tshologetse kwa mabelong go ema nokeng batabogi, a re se ke bokao jwa gore setshaba jaanong se tsile mo nakong ya go lemoga gore metshameko e na le mosola.

Rre Bogatsu a re o ikaelela go rulaganya bokopano le banana ba kgaolo ya gagwe gore ba tle ba mo rolele matshwenyego, dkeletso le ditoro tsa bone e le tsela nngwe ya go ba thusa go godisa dikitso tsa bone tsa botaki le bodiragatsi.

A re o rotloetsa ba ba nang le dikitso tsa bodiragatsi go dira ka natla gore ba kgone go ngoka balatedi, bareki le barotloetsi.

Rre Bogatsu a re o dumela gore mokoduwe go tsosiwa o e itekang, a re sephiri sa katlego mo bodiragatsing ke go itsaya tsia le go ipelega go na le go phutha matsogo.

O supile fa mananeo a ka berekela batho fa ba na le maikaelelo a go dira ka natla go re ba fitlhelele ditoro tsa bone.

O kgothaditse batsadi go rotloetsa bana fa ba na le kgatlhego ya metshameko ga mmogo le go batla metlhala ya khumo mo metshamekong le mo bodiragatsing gore ba feme go tsena mo ditseleng tse di ba gogelang kwa thaelong ya dinotagi le botlhoka tsebe ka go farologana. BOKHUTLO