21 Nov 2025

Ba lephata la botsogo mo Molepolole ba tshwenngwa ke dipalo tse di golelang pele tsa bana ba ba tsholwang pele ga nako ya pelegi.

Moitseanape wa booki mo lekalaneng la tlhokomelo baimana le tsa pelegi kwa sepateleng sa Scottish Livingstone, Mme Boineelo Ketshabathupa  are dipalo di oketsegile go menaganye mo sebakeng sa ngwaga tse pedi, ka gore ka ngwaga wa 2024, bana ba ba tshotsweng pele ga nako  e ne ya nna diphesente di le masome a matlhano le boferabongwe.

Mme Ketshabathupa o buile se ka letsatsi la mafatshefatshe la segopotso sa bana ba ba tsholwang pele ga nako ya pelegi kwa Molepolole bosheng.

Letsatsi le ne le tshwere ka setlhogo se se reng: Neela ngwana yoo tshotsweng pele ga nako tshimologo e e nonofileng gore ba nne le bokamoso jo bo edileng kgotsa jo bo phatsimang.

Mme Ketshabathupa a re maikaelelo a go keteka letsatsi le, ke go gakolola botlhe botlhokwa jwa go tlhokomela ngwana mongwe le mongwe go sa kgathalese nako e lesea le tsileng ka yone.

O supile gore mo lefatsheng ka bophara, go akanyediwa gore ngwaga le ngwaga bana ba ba tsholwang pele ga nako ya pelegi ba ka nna didikadike di le lesome le botlhano. 

Mme Ketshabathupa a re se sa jeseng diwelang ke gore dipatlisiso di supa fa ba le sedikadike ba tlhokafala ntateng ya manokonoko le ditlamorago tsa go tsholwa pele ga nako ntswa go na le se se ka dirwang gore go fokotswe dintsho tsa bana bao.

A re ka ngwaga wa 2023 go tshotswe bana ba le makgolo a mane le boferabobedi mme ba le lekgolo le masome a mararo le boferabobedi ba tshotswe pele ga nako.

Ba le masome mabedi le boraro ba ne ba tlhokafala mme ba itemogela gore diphesente tse di masome mararo le boroba bongwe ke tsa dintsho tsa bana ba ba tshotsweng pele ga nako.

O tsweletse a re ka ngwaga wa 2024 ba ne ba amogela masea ale makgolo a mararo le masome a ferabongwe le borataro, ba le lekgolo le masome a mabedi le botlhano ele ba ba tshotsweng pele ga nako.

Gone ga nna le dintsho tse masome a mabedi le botlhano, mo go tsone ba le lesome le boraro, ele ba ba tshotsweng pele ga nako.

Are se se tshwenyang ke gore ngwaga le ngwaga dipalo tsa bana ba ba tsholwang pele ga nako di a tsholetsega, ka jalo a re tlhokomelo ya baimana ee maleba le thuso go tswa lwapeng di ka fokotsa pelegi ee tlang pele ga nako le dintsho.

Ngaka ya bana, Mme Tuduetso Ncube a re bana ba ba tsholwang pele ga boimana bo wela ba tlhoka tlhokomelo e e faphegileng mme lephata la bone le na le dikgwetlho.

Mme Ncube o kaile fa sepatela sa Scottish se sena ditlamelo, mme ka mabaka ao, ba romela balwetse kwa sepateleng sa Marina kwa Gaborone. A re sepatela se na le moitsaanape wa tsa tlhokomelo ya boimana le masea a le mongwe, a thusiwa ke baoki. BOKHUTLO