21 Nov 2025

Tona wa Lephata la Banana le Merero ya Bong, Mme Lesego Chombo a re letsatsi la borre le tlhometswe go lemoga le go akgola borre ba ba bokao mo setshabeng, mo malwapeng a bone ga mmogo le tikologo e ba tshelang mo go yone.

O buile jalo kwa segopotsong sa letsatsi le, kwa Artesia ka Laboraro. A re letsatsi le, ke nako ya  go itsaya motlhala, go sekaseka tse di dirwang ka dikgang tsa merero ya tsa bong, go lebilwe segolo-bogolo tekatekano le ka fa bomme le borre ba gatang ka teng mo go tsa ditlhabololo.

Monongwaga, letsatsi la borre la mafatshefatshe le tshwerwe ka setlhogo se se reng: A re emeng borre le basimane nokeng, re ba fe sebaka sa go nna tlotlo le kutlwelobotlhoko.

Mme Chombo a re setlhogo se gwetlha gore borre le bana ba basimane ba tshelele mo tikologong e e ba rotloetsang go tshela ka tshosologo, ba itekanetse e bile ba na le boikarabelo ga mmogo le bopelotlhomogi.

“Re patelesega go kgotlhatsa borre le basimane go nna le botsogo jwa mmele, maikutlo le tlhaloganyo. A re emiseng go kgetholola borre, ka se felela se ba tsenya mo tsietsing fa ba tlhoka thuso le gone go ba pateletsa go swela ka fa teng,” ga tlhalosa Mme Chombo.

Mme Chombo a re dipatlisiso tsa lephata la botsogo, di supa fa batho ba feta dikete di le masome a mane (43,000), ba amilwe ke bolwetsi jwa tlhaloganyo mo Botswana.

O tsweletse a re mo palong e, borre ba masome matlhano le bobedi mo lekgolong, fa bomme ba le masome a mane le bosupa.  Mme Chombo a re go botlhokwa go lemoga fa se, e se dipalo fela, mme go supa fa bolwetse jwa tlhaloganyo e le kgwetlho lefatshe ka bophara.

“Re tlamega go tswa ka metlhale e e maleba go tlhomamisa fa re le tshaba e e pelonolo le pelotlhomogi,” a tlhalosa.

Mme Chombo a re bolwetse jwa tlhaloganyo, segolo-bogolo mo go borre, bo ba ama phetelela ka jaana go le gantsi, bo ba gogela kwa go ikgapeleng botshelo le gone go kgokgontsha tota.

A re ke ka moo go leng botlhokwa go tlhomamisa gore maikutlo a bone a rekegelwa le gone go totobisiwa go fitlhelela ba itshetlela.

O tsweletse a lemotsha botlhokwa jwa go sekaseka ditsamaiso dingwe tse di bayang borre ka fa mosing, segolo bogolo tse di ba thibelang go kua mokgosi fa mpuru a faretswe.

“A re tlotleng go rotloetsa borre go bua fa e tsentse tlhako kgamelong, kana ngwana o sa leleng, o swela tharing.”

Tona Chombo a re dipatlisiso di supa fa basimane ba ba rutuntshiwang ka boikarabelo, ba kaelwa ka fa ba ka laolang maikutlo a bone ka teng, ba fatlhoga go nna borre ba ba nang le boikarabelo mo malwapeng a bone le setshaba. Ka jalo, a re go maleba go godisa bana ka kelotlhoko le bopelonomi. 

Tona Chombo a re go botlhokwa go rotloetsa borre le basimane go sala morago ditoro tsa bone tsa thuto, go itekodisa ba bongaka kgapetsa-kgapetsa le fa ba sa lwale ga mmogo le go itshola sentle mo setshabeng.

“Re itemogetse fa go tlhoka tekatekano ya bong le go gobelela borre le basimane e le dingwe tse di godisang kgokgontsho,”ga tlhalosa Mme Chombo.

Ka jalo, a re go botlhokwa go fa borre le basimane maele a botshelo, le go rarabolola dipharologanyo ka kagiso.

Tona Chombo o tlhomamisitse fa lephata la gagwe le itlamile go ema borre le basimane nokeng, ka jalo ba bulegetse go amogela megopolo le maele a go tlhabolola ditirelo tse di itebagantseng le bone, go rurifatsa fa ba tshelela mo tikologong e e babalesegileng.

A re jaaka go ipelelwa letsatsi la borre, go botlhokwa go lemoga dikgwetlho tsa bone. BOKHUTLO