18 Nov 2025

Banni ba Matsitama, Makobo, Jamataka le Mathangwane ba ikopetse go fiwa ditirelo tse di amanang le tiriso ya lefatshe kwa lekgotlaneng la kabo ditsha la Tonota.

Banni ba metse e, ba tsaya ditlamelo tse di amanang le tiriso ya lefatshe kwa lekgotlaneng la kabo ditsha la Marapong le le ka fa tlase ga kgaolo ya Tutume. Le fa go ntse jalo, metse yotlhe ka bone e wela mo kgaolong ya Tonota.

Fa a bua mo potsolotsong bosheng, molaodi wa kgaolo ya Tonota, Rre Keabetswe Lesiela o tlhalositse fa banni ba ntshitse kopo eo makgetho a le mmalwa mo diphuthegong tsa mapalamente ga mmogo le mo bokopanong jwa badulasetilo ba khansele ka go farologana.

Rre Lesiela o ne a tlhalosa fa metse eo yotlhe, e wela ka fa tlase ga khansele ya Tonota, ka jalo e tsaya ditlamelo tsotlhe tse di fiwang ke ba khansele koo. O supile gore se se ba tshwenyang ke gore ba tsaya ditlamelo tsa lefatshe kwa lekgotlaneng la kabo ditsha la Marapong.

Le fa go ntse jalo, Rre Lesiela a re ofisi ya gagwe e ne ya rwala ditlhako go ya go buisana le banni ba metse e o ka go farologana, maikaelelo e le go tsaya maikutlo a bone, mabapi le keletso ya go thusiwa ke ba Tonota ka ditlamelo tsa lefatshe. 

O tlhalositse gore mo bokopanong le banni ba Matsitama, Makobo le Jamataka ba ne ba papamala, ba supa fa ba batla go fiwa ditlamelo tsa lefatshe ke ofisi ya Tonota, ka jaana tsela ya go ya ko Marapong e le matsopodia, e le mogoa moleele, mme go ka nna bonolo go thusiwa ko Tonota.

Le fa go ntse jalo, Rre Lesiela a re ba motse wa Mathangwane bone ba ne ba le makgamu, bangwe ba supa fa go tsaya ditlamelo tsa lefatshe kwa Marapong go siame fela, fa ba bangwe ba supa ba batla go fudusediwa kwa Tonota.

“Mme fa re tsaya e le tshoboko, re ne ra lemoga gore bontsi jwa ba re buileng le bone keletso ya bone ke go tsaya ditlamelo tsa bone tsa merero ya lefatshe kwa lekgotlaneng la kabo ditsha la Tonota,” ga tlhalosa jalo Rre Lesiela.

O ne a tlatsa ka gore e ne yare morago ba kopana le go buisana le baeteledipele ba kabo ya ditsha ba dikgaolo tse pedi tse, maikaelelo e le go ba rolela maikutlo a banni ba metse e.

Rre Lesiela a re ba kabo ditsha ba supa fa matshwenyego a bone a magolo e le tlhaelo ya ditsompelo ka jalo ba sa kgone go thusa banni ba metse e ka fa ba neng ba eletsa, mme e seng kgang e ka kganelang gore mogopolo o atlege.

Le fa go ntse jalo, Rre Lesiela a re mo nakong ya gompieno ba mo lenaneong la go rolela khansele ya Tonota kgang ya banni ba metse ka bone.

“E tla are khansele ya Tonota e tsena mo bokopanong mo bekeng e tlang, re e begele mogopolo oo go utlwa maikutlo a bone ka kgang e, mme e tla re go tswa foo re kwalele Tona wa tsa lefatshe le temo thuo gore a re fe taelo go tswa mo ditshekatshekong tsa gagwe”, ga tlhalosa Rre Lesiela.

Mo nakong ya gompieno, metse ya Matsitama, Makobo, Jamaka le Mathangwane e wela ka fa tlase ga kgaolo ya Tonota mme ditlamelo tsa kabo lefatshe ba di fiwa ke lekgotlana la kabo ditsha la Marapong, le le welang kwa tlase ga kgaolo ya Tutume. BOKHUTLO