18 Nov 2025

Motse wa Shoshong o ntse o itemogela tlhaelo ya metsi fa e sale ngogola ka kgwedi ya Phalane ka ntlha ya go senyega ga lefelo la metsi kwa Pallaroad.

Ka jalo, e rile bosheng, tona wa Metsi le Bonno Rre Onneetse Ramogapi a lekola banni ba motse ka seemo se, mme a tlhalosa fa puso e tlaa leka ka gotlhe go fefosa tlharabololo ya seemo se, ka jaana ba tlhaloganya fa metsi a le botlhokwa mo matshelong a setshaba ka kakaretso.

Are mo nakong ya gompieno, ba lekile go tsisa tharabololo ka go refosa metsi le motse ga mmogo le go siela banni ka dibaosara e le tharabololo ya nakwana.

A re tharabololo ya sennela ruri e tlaa rarabololwa ke kago ya mafaratlhatlha a a fetlhang metsi e e agiwang kwa Palla Road e go solofetsweng gore e tla wela ka Sedimonthole ngwaga ono, kana Hirikgong ngwaga o o tlang.

Rre Ramogapi o ne gape a rolela banni babeeletsi ba lenaneo la Bonno kwa Shoshong. Tona o gateletse maikaelelo a lenaneo la Bonno, a re ke go thusa Batswana ka matlo a bonno.

Rre Ramogapi o ne a rola babeeletsi bale batlhano ba ba tlaa agang matlo a le 850 kwa Shoshong, a supa fa go na le ba bangwe ba ba supileng kgatlhego mo kagong ya ditsha tse di 1,000 tse di sikilweng kwa kgotleng ya Phephenyane gone kwa Shoshong.

Banni ba ne ba supa fa seemo sa metsi se sa ba jese diwelang ka jaana se kgoreletsa matshelo a bone a letsatsi le letsatsi. Ba ne ba supa fa seemo se sele maswe thata kwa kgotleng ya Mahutaganyane ba re ga gona metsi gotlhelele.

Mongwe wa banni, Rre Dipotso Pitlagano a re seemo sa metsi se potlakelwe ka gore le ntse go dirilwe maiteko a go se tsibogela, ga go a lekana. Rre Pitlagano o ne a ntsha moakanya wa gore go epiwe sediba se se ka nosang morafe.

Rre Tladi Lekwapa a re seemo se felela se dira gore banni ba tshele ka go tlhoka boitumelo ka e bile go sena therisano ya bone le babereki ba koporase ya metsi. Rre Lekwapa a re therisano e botlhokwa ka jaana morafe le o ne o ka ntsha megopolo le maano a go hema seemo.

Fa a tswa la gagwe, mopalamente wa kgaolo ya Shoshong Rre Moneedi Bagaisamang are o solofela gore seemo se tlaa rarabololwa ka bonako. Rre Bagaisamang a re banni ba Shoshong ba sokodisitswe ke seemo sa metsi ka lobaka, a re maiteko a lephata la metsi a tokafaditse seemo.

Fa a itebaganya le kgang ya Bonno a re tsholofelo ya gagwe ke gore lenananeo le tlaa akaretsa kgaolo yotlhe ya Shoshong. BOKHUTLO