12 Nov 2025

Mapodisi a Lobatse a mo patlong ya monna mongwe wa motse wa Molapowabojang yo go belaesegang a timetse.

Moo potsolotsong le BOPA, mothusa mookamela mapodisi a Lobatse assistant superintendent Montsho Segokgo a re mapodisi a begetswe tiragalo e, ka kgwedi ya Phalane a le malatsi a le masome a mabedi le botlhano ke ba losika ba supa fa monna yoo wa dingwaga tse di masome a marataro le boferabobedi (68) a sa bonwe. 

O ne a tlhalosa gore ba sepodisi ba ne ba ikgolaganya le banni ba Molapowabojang go bolotsa letsholo go batla monna yo a kaileng a ise a bonale go fitlha mo nakong eno. 

O tlhalositse gore monna yoo ke motho yo o tshelang ka seemo sa tlhaloganyo ee sa iketlang(dementia) ka gore mo nakong e e fetileng, ba sepodisi ba kile ba begelwa fa a ne a timetse mme ba ne ba mmatla ba bo ba mmona mo nakong e khutshwane. 

Ass. Superintendent Segokgo o tlhalositse gore o tshwenngwa ke gore mo nakong eno ba mmatlile sebaka se se leele mme le jaana monna yoo ga a ise a bonale. 

Mothusa mookamela mapodisi a Lobatse, Rre Segokgo a re ba begetswe gore monna yoo o bonwe la bofelo a apere borokgwe jo bohibidu le sekipa se se botala jo bo gateletseng mme se kgwarilwe ka ditselana tse di mmala o mohibidu le mmala o o mosetlha e bile a rwele ditlhako tse dintsho. 

A re mo nakong eno ba sepodisi ba boloditse letsholo ba tshwaraganye le morafe go mo senka. BOKHUTLO