Rre Ganakgomo a re tshwaragano ya puso le makalana a a ikemetseng e na le seabe mo go tlhabololeng lefatshe le batho ba lone.

Rre Ganakgomo o buile se fa khamphani ya disukiri ya Tongaat Hulett Botswana, e e tlwaelesegileng ka leina la Blue Crystal, e ne ya abela bagwebi ba ba botlana dimausu tse di lopileng P140 000.

Ratoropo o supile fa ka nako ya dipula, bagwebi ba sa theogele ba paledisiwa ke gore dithoto tsa bone di tlaa koloba. 

Ka jalo a re mpho e, e tlaa ba thusa gore ba rekise le ka nako ya pula.

O boletse gore ba ba abelwang dimausu, ba dira maiteko a puso a boipelego le go nyeletsa lehuma.

 A re maiteko a bone a boipelego, a dirile gore ba lemogiwe, ka jalo a ba rotloetsa go amogela mpho e tona e ka maatlametlo.

Ratoropo Ganakgomo o tsweletse a gwetlha ba dikgwebo tse dingwe go inaakanya le go thusa setshaba, go tsaya karolo go tlhabolola matshelo a Batswana mme a akgola thata ba khamphani ya Tongaat Hulett Botswana.

Mogolwane mo mohameng wa tsa papadi le thekiso kwa khampaning eo ya disukiri Rre Thapelo Mfosi o boletse fa tiro  ya go aba e gwetlhilwe ke go batla go tsisa pharologanyo mo matshelong a setshaba. 

A re maikaelelo a khamphani ke go tsisa pharologanyo mo matshelong a Batswana. 

Rre Mfosi o boletse gape gore ba ikaelela go rotloetsa Africa mo isagong, le gone go dira gore go nne le bokamoso jo bontle jwa batho botlhe.

 O boletse gore ba na le maikaelelo a mangwe a akaretsa botsogo le boitekanelo, thuto ya maemo a ntlha, a tlatsa ka gore khamphani e setse e dirile gole go ntsi jaaka go nna le seabe mo Diacore Gaborone marathon, go bereka le dikole tse dipotlana, a tlhalosa fa  ba agile ntlwana ya borutelo kwa sekoleng se sebotlana sa Mosu. 

Rre Mfosi a re ngwaga le ngwaga ba bereka le Lobatse Town Council go akgola le go lemoga baithuti le barutabana ba ba dirileng sentle mo ditlhatlhobong tsa makgaola-kgang.

A re ba tsweledisa maikaelelo a bone ka go tsisa pharologanyo mo setshabeng ka go abela bagwebi ba ba botlana dimausu go tsweledisa dikgwebo tsa bone.

Mookamedi wa Tongaat Hullet Botswana Rre Peter Freeman a re ba bone go tshwanela gore ba abele ba dikgwebo potlana dimausu gore ba kgone go lepalepana le seemo sa loapi fa se fetoga, a re seo se tlaa dira gore dikgwebo tsa bone di gole. 

Rre Freeman o supile fa sengwe le sengwe se na le tshimologo a tsibosa fa dikgwebo tse dipotlana tse di tlaa godisa toropo ya Lobatse le lone lefatshe la Botswana.

 Mongwe wa bagwebi ba ba abetsweng semausu Mme Ruth Motingwa o lebogetse se ba khamphani ya Tongaat Hullet Botswana e se ba diretseng morago ga go lemoga tshokolo ya bone bogolo jang mo diemong tsa phetogo ya seemo sa loapi jaaka diphefo le dipula, a tlatsa ka go akgola le yone khansele ya toropo ya Lobatse a re e ba thusitse morago ga go lemoga maiteko a bone e le bagwebi ba ba botlana. BOKHUTLO