04 Nov 2025

Go tsoma ntle teseletso go ile magoletsa mo Okavango.

 Ka jalo mapodisi a ikuela mo setshabeng go lwantsha bogodu jwa diphologolo jo bo kekelang kwa kgaolong ya Okavango bogolo jang kwa mafelong a sireleditsweng. 

 Fa a bua ka bogodu jwa diphologolo, Constable Peter Ramakoloi wa sepodisi sa Gumare a re ba tsweletse ka go amogela dikgang tse diphologolo tsa naga di bolaiwang kwa mafelong a tshireletso ya diphologolo.

Constable Ramakoloi a re go tsewa dikarolo dingwe mo go tsone jaaka matlalo le dinaka tsa ditlou, mme seo e le borukuthi. 

O buile jalo kwa thuto-seka-dipuisanyong ya tshomarelo diphologolo tsa naga ya Sustainable Wildlife Management kwa  Gumare ka Labobedi.

O supile fa go bolawa ga diphologolo ntle le teseletso go atile thata mo mafelong a tshireletsego ya diphologolo a NG26 le NG25 kwa Okavango. 

Rre  Ramakoloi a re phologolo ya Letswee e amega thata mme e tsomelwa go jewa ka yone e se borai jaaka tlou le tau. A re nare le tholo le tsone di a amega mo letsomong la bogodu.

 O tlhagisitse fa e le molato go fitlhelwa ka se se belaesegang ele nama ya phologolo ya naga.

O ne a tswelela a tlhalosa fa go na le go tshwarwa ga ditlhapi mo go sa letelesegeng ka seelo se se kwa godimo kwa mafelong a a sireleditsweng.  

Constable Ramakoloi a re go supa fa ditlhapi tseo di omisiwa di bo di rekisiwa kwa mafatsheng a a kwa ntle. 

Kgosi Kenaletsala Fish wa motse wa Nokaneng o gwetlhile dikgosi go tshwaragana go lwantsha bogodu jwa diphologolo tsa naga. 

A re dikgosi di tswa kgakala di na le karolo e kgolo mo tshomarelong ya di tsa tlholego jaaka diphologolo le makgobokgobo. 

BOKHUTLO