Tautona Advocate Duma Boko, o ne a etetse ba lelwapa loora Mohwasa ka Matlhatso, go ba gomotsa morago ga go tlhokafala ga ga Mme Tsholofelo Mohwasa, kgaitsadia tona wa Merero ya Ofisi ya ga Tautona, Rre Moeti Mohwasa.

Mme Mohwasa o tlhokafetse Phalane a tlhola malatsi a le masome a mabedi le motso mme o bolokilwe kwa Sefhophe Phalane a le masome a mabedi le borobabongwe. Fa a fa tekodiso mo boemong jwa ba lelwapa, Mme Valeciah Mogegeh, o supile fa Mme Mohwasa a ne a tshwenngwa ke bolwetse jwa pelo.

Tautona Boko, o gateletse botlhokwa jwa popagano ya masika, bogolo jang mo dinakong tse di thata di tshwana loso. 

A re ba ikaege ka Modimo mme ba amogele fa sengwe le sengwe se na le thulaganyo. 

Tautona Boko o supile fa lephata la botsogo le lebanwe ke dikgwetlho jaaka tlhaelo ya melemo le tse dingwe, mme puso e dira ka gotlhe go batla ditsela tse di maleba go di rarabolola, gore setshaba se bone thuso e e maleba.

A re Batswana ba nne ka tsholofelo gore le fa theko ya diteemane e wetse tlase, seemo se se amileng itsholelo, dilo di tlaa boela mannong. Tautona Boko a re puso le ba-na-le-seabe ka go farologana, ba tlaa tswelelela ba thulanya ditlhogo, go tsaya ditshwetso tse di maleba e bile di tsisa pharologanyo.

A re puso e tsweletse ka go tsisa ditlamelo tsa botsogo tsa botlhokwa di akaretsa diipone tsa maranyane (X-ray and Scan) gaufi le batho go leka go fokotsa mesepele e bangwe ba e tsamayang go bona ditlamelo tseo le gone go fokotsa nako e telele ya go leta pele motho a ka bona thuso.  BOKHUTLO