16 Oct 2025

Moemela bogosi jwa ga Ngwaketse wa boraro Kgosi Kwelagobe Mookodi o kopile morafe waga Ngwaketse go tlotla le go sireletsa Kgosi Malope II.

Kgosi Mookodi o buile se mo phuthegong ya kgotla e e neng e buisiwa ke Kgosikgolo wa Bangwaketse Kgosi Malope II ka Laboraro e maikaelelo a yone e neng e le go bolotsa letsema. O supile fa morafe e le one o tshwanetseng wa sireletsa kgosi, a tlhalosa fa bangwe ba na le mokgwa wa go tlhasela kgosi, fa a biditse phuthego ya kgotla.

“Bangwe ba ipoleletse gore ga ba tsena mo kgotleng kgosi a biditse lebatla, ba ya go mo tlhasela, go tsamaela gore re seka ra tlhola re le supa mo kgotleng ee. Re tlaa go tlhasela o bo o babalelwa, motho o re tlogetswe nae, a re mo sireletseng,” ga bua jalo Kgosi Mookodi.

Kgosi Mookodi o tlhalositse fa ba tlaa tswelela ba na le Kgosi Malope II ba mo tshegeditse, gore se a se eleletsang go se direla morafe se diragale.

Rangwaneagwe Kgosi e bong Kgosi Thatayaone Makaba one a lekodisa morafe fa kgosi a ntse a sa tsoga ka one a tlhasetswe ke dikgang tsa makgotla tshekelo tse a neng a latofadiwa fa a sa tshwanelwa ke setilo sa bogosi.

Kgosi Makaba one a supa fa ka tsamaiso, kgosikgolo a sa seke, a tlhalosa fa molao o itebagantse le mong wa dikgang tseo, yo a setseng a supile fa a sa iponea molato. O ne tlhalosa fa katlholo ya tsheko eo e tlaa tsena ka Motsheganong 2026.

Fa a akgela, Mme Thato Ketsitlile o ne a kgala mokgwa o a tlhalositseng o sa amogelesege wa go gakolola kgosi mo phuthegong ya kgotla, a supa fa kgosi a gakololelwa kwa bo-thokong.

Mme Ketsitlile o ne a tlhalosa fa motho a tshwanetse a ikoba fa a bua le kgosi, a tlhalosa fa bogosi jo ele jwa bone ele Bangwaketse, ka jalo ba tshwanetse ba bo sireletsa.

Mo go tsa temo, Mme Ketsitlile one a kgala Bangwaketse a tlhalosa fa ba sena tlhokomelo mo dijwalong tsa bone morago ga go baya tema. O ne a rotloetsa balemi go nna le mowa wa boipelego, a tlhalosa fa ba sa tshwanela go baa fela mo dipeong tse di abiwang ke puso ngwaga le ngwaga.

O gakolotse gore molemi o tshwanetse go rekisa thobo ya gagwe mme a ithekele peo ka letseno le a le dirileng, mme a ba kopa gape go fetola mokgwa o ba nang le one mo temong.

Fa a bolotsa letsema, Kgosi Malope o ne a rotloetsa morafe go ya go lema le gore ba tlhokomele temo ya bone gore leruo le seka la senya dijwalo.

Kgosi Malope o tlhalositse fa a tswalela manyalo go simolola Sedimonthole a tlhola gane mme a tlaa buelwa gape ka Hirikgong a le lesome le bone ngwaga oo latelang, seo e le go fa morafe sebaka go tsaya karolo mo temong. BOKHUTLO