04 Sep 2019

Go bolelwa fa makhanselara ba tlogela tiro ya bokhanselara le bokopano fela fa letsatsi la ditlhopho le setse le gorogile.

Mo potsolosong le BOPA, motshwarelela mokwaledi wa kgaolo-potlana ya Serowe, Rre Mogorosi Kokoro a re fela jaaka khuduthamaga ya ga Tautona makhanselara ba tswelela le ditiro tsa bone go fitlhelela letsatsi la bofelo.

A re le mororo palamente e sa tswa go phatlaladiwa makhanselara ba tswelela fela ka diphuthego tsa bone go fitlhelela motlha wa bofelo go iwa ditlhophong tsa setshaba.

Moanamisa mafoko wa kgaolo-potlana ya Serowe, Rre Onkabetse Ntwe o boletse fa khansele e tsamaisiwa ke melawana ya yone,a bolela fa makhanselara ba tswelela fela le diphuthego le mananeo a bone a khansele.

Mokhanselara Solomon Dikgang wa Tidimalo mo Serowe le ene o boletse fa ba tswelela le tiro ya bone jaaka e le tlwaelo. BOKHUTLO