28 Mar 2017

 Barutabana ba sekole se segolwane sa Mosikari kwa Machaneng mo kgaolong ya Tswapong ba ikaelela go dira gotlhe mo ba ka go kgonang gore ba ntshe maduo a a nametsang le ntswa ba lebanwe ke kgwetlho ya go tlhoka kemo nokeng ya batsadi.
E rile a bua mo puisanong, mothusa mogokgo wa sekole seo, Rre Zacharia Sebopelo a re batsadi ba goga dinao mo go betleleng bana ba bone bokamoso.
Rre Sebopelo a re e le barutabana ba tsere boikarabelo jotlhe jwa go fa bana lesedi la botshelo ga mmogo le go bopa botho jwa bana.
O tlhalositse gore batsadi ga ba na mabaka ape a a utlwalang a gore ka go reng ba sa tshwaragana le barutabana.
O supile fa ba leka ka bojotlhe go supa kgatlhego ya go bereka le batsadi.
O ne a re ba nna ba buletse batsadi dikgoro tsa go tla sekoleng nako nngwe le nngwe go tla go lekola ka fa bana ba tsweletseng ka teng, a re mme batsadi ga ba bonale.
A re gape ba nna maswabi fa ba bitsa diphuthego ka maikaelelo a go tla go lekodisana ka bana ka jaana go nna go tla batsadi ba le bangwefela e bile ba le boutsana.
O ne a kaya fa go le botlhokwa gore morutabana le motsadi ba bereke mmogo.
O ne a bolela gore fa ngwana a na le mathata a a ka kgoreletsang thuto ya gagwe kwa lwapeng kgotsa mo sekoleng, ke tshwanelo ya gore bobedi joo bo itse bo bo bo thusane go ka tswa ka tharabololo.
A re go leka go ikatametsa gaufi le batsadi, ba dule ka mogopolo wa gore ka dinako tse dingwe ba tshwarele diphuthego mo kgotleng kgolo ya motse.
A re ngwana ke wa motsadi mongwe le mongwe, a bolela fa a eletsa gore fa ba bitsa diphuthego batsadi botlhe le ba ba senang bana kwa sekoleng ba tsee karolo.
Rre Sebopelo a re fa bana ba sa rutega ka dipalo tse dintsi mo motseng, e nna kgwetlho ka jaana diemo di tshwana le borukutlhi di golela pele. BOKHUTLO