21 Jan 2024

Banni ba Sikwane ba ikuetse mo pusong go ba tswa thuso ka go fudusa  dikwena tse di bonweng mo nokeng ya Madikwe.

Go bonwa go dikwena ke seemo se se sa tlwaelesegang mo metseng ya dinokeng e mo kgaolong ya Kgatleng.

Ba ikuetse jalo mo phuthegong ya kgotla e neng e buisiwa ke mopalamente wa Kgatleng Botlhaba, Rre Mabuse Pule bosheng.  

Banni ba tlhalositse fa dikwena tse, di ba baya ka fa mosing ka ba tshela ka go tsoma ditlhapi le go nosa leruo mo nokeng ya Madikwe.

Ba boletse go re fa seemo se, se sa tsibogelwe ka bofefo matshelo a bone a ka tsena mo diphatseng ka ba tshelela mo poifong ya go re dikwena di ka gapa matshelo a bone.

Mongwe wa banni, Mme Jullen Tlhowe o ne a ntsha mogopolo wa go re lephata la diphologolo le makgabisa naga le rute banni ka bodiphatsa jwa diphologolo tsa mofuta o, a tlatsa ka  go re ba tshwanetse go tsenya mekwalo e e tsibosang setshaba ka tsone.

Bontsi jwa batsena-phuthego ba boleletse mopalamente e fa ba tshwenyegile ka jaana ba lephata la diphologolo le makgabisa naga ba sa tsibogele seemo se ka potlako.

Fa a araba banni ka kgang ya dikwena tse di bonweng mo nokeng ya Madikwe gaufi le motse wa bone, mogolwane wa lephata la diphologolo le makgabisa naga wa kgaolo ya Kgatleng, Rre Kealeboga Komanyane o tlhalositse fa ba itse ka seemo se, mme a supa fa ofisi ya gagwe e dira  bojotlhe go tsibosa batho ka dikwena tseo.

E rile Mopalamente a ntsha la gagwe a ba tlhagisa ka bodiphatsa jwa diphologolo tsa naga, mme a ba itsise fa a boleletse tona yo o maleba ka dikwena tseo.

 Fa a lekodisa morafe ka dikgang tse dingwe, Rre Pule o supile fa palamente e e fetileng e fetisitse melao kakanyetso e le boferabongwe e akaretsang wa go sireletsa batho ba nang le bogole, go thupiwa  ga batho le a mengwe fela jalo.

A re molao oo o tla sireletsang ba-nan-le bogole o rotloetsa go re le bone ba nne le seabe mo tlhabololong ya lefatshe le go lemogiwa fa ba na le bokgoni.

Rre Pule o ne a supa fa a tshwenngwa ke banni bangwe ba ba busetsang ditlhabololo tsa motse kwa morago a gatelela gore ditlhabololo gore di nne teng go tshwanetse ga nna le tirisanyo mmogo fa gare ga boeteledipele jwa motse le morafe.

O ne gape a ba rotloetsa go ikwadisetsa ditlhopho ka dipalo tse di kwa godimo ka jaana e le tshwanelo ya bone. Bokhutlo