06 Jun 2022

Mapodisi a Palapye a tlhotlhomisa tiragalo e mo go yone koloi ya modiro wa Wish e neng ya thulwa ke terena ka tshipi.

Mo potsolotsong le BOPA, mookamela mapodisi a Palapye Superintendent Mokopi Nawa o tlhalositse fa tiragalo eo e diragetse fa makgabaganyong a terena mo kgotlaneng ya Serorome.

Superintendent Nawa are mokgweetsi wa koloi eo, ke  rre wa dingwaga tse di masome a matlhano le botlhano,  mme o ne a le nosi  mo koloing ka nako ya tiragalo.

O boletse fa rre yo a ne a  bona dikgobalo tse di potlana mme a bonwa ke ba bongaka ba ba neng ba mo golola lone letsatsi leo.

Are koloi eo, e ne ya seka ya amega mo go kalo, ka e senyegile mo letlhakoreng la molema kwa morago.

Le fa go ntse jalo, Rre Nawa o ne a gakolola bakgweetsi gore ba nne kelotlhoko mo makgabaganyong a terena le gone go sala melao ya tsela morago go tila ditiragalo tsa mofuta o. BOKHUTLO