26 Sep 2018

Mongwe wa batho ba ba emeng ka dinao go ipetlela botshelo ke Rre Kgakgamatso Mbakhwa wa dingwaga tse di masome mararo le bobedi yo o ntlafatsang ditilo ka dikhurumelo tsa mabotlolo.
O tlhalositse fa kgwebo e, e le mpho ya Modimo. A re o ne a bona bananyana ba tshameka ka dikhurumelo, mme go na le yo o neng a senyetsa ba bangwe mo go bone.
O ne thusa ba baneng ba senyediwa mme a tlhomaganya dikhurumelo tse, a bo a di gata ka leoto ka phoso mme a makadiwa ke go bona di sa thubege.
Rre Mbakhwa a re go tsweng foo o ne a lomaganya dikhurumelo tse mme a dira setilo sa ntlha kwa motsaneng wa Tewane.
A re thulaganyo ya go loga e ne e ise e lolame mme a seka a ipona tsapa ka jaana a ne a di rwala a ya Mmankgodi mme a feta a loga moalo sesha ga bo ga felela go tswa moalo o o botokanyana.
O boletse fa thuto e sa felele mo ntlwaneng ya borutelo mme sengwe le sengwe se motho a se dirang ka diatla e le sekolo.
A re se, se senotswe ke go lemoga fa go dira ditilo go mo tlama go itse gore o tsenya dikhurumelo tse kae, o bafa jang le gore o tswakanya mebala jang. Monana yo wa Senete a re o feletse ka foromo ya boraro ko sekolong mme a ya go ithuta go penta le go kgabisa kwa CITF. O boletse fa a simolotse go dira ditilo tse ka 2015 mme ya re ngwaga ono a kwadisa khamphane ya gagwe e e bidiwang KK Innovations.
O tsweletse a bolela fa a rekiseditse tautona wa pele Lt Gen. Dr Seretse Khama Ian Khama ditilo di le lesome, a rekisetsa le batho ka bongwe ka bongwe segolo bogolo barati ba kgwele ya dinao.
A re ditilo tse dingwe di rekilwe ka dikoko tsa setswana. O bile a bolela fa a aga ntlo ya dintsa le meriti mo nakong ya gompieno ka mabotlolo a metsi aa rekisiwang. A ba a bolela fa a nale mongwe yo a mothusang mo tirong ya gagwe ya letsatsi.
Rre Mbakhwa a re o sela dikhurumelo tse a di dirisang mo mapalamelong a dibese, diotele le mo mekgwatlheng. O bile a galaletsa kgwebo e ya gagwe a bolela fa e mothusa go tlamela ba lelwapa la gagwe.
Monana yo a re fa a dira setilo, o kgobokanya mebala e moreki a e batlileng ya dikhurumelo, a di tlhatswe a bo a meta selekanyo sa foraime ya setilo mme a itse go phunya dikhurumelo tse a bo a di tsenya mo foraimeng mme a di bofeganye. O tlhalositse fa a ikaelela go godisa kgwebo ya gagwe ka go rutuntsha Batswana ba bangwe ba ba senang ditiro gore ba kgone go oba letsogo.
A re o ikaelela go ikopanya le ba ba itebagantseng le go rekisa dithoto ko ntle ga Botswana gore a utlwe fa a ka se kgone go rekisa ko ntle.
Rre Mbakhwa a re bomolemo jwa kgwebo ya gagwe ke gore e itebagantse le tshomarelo tikologo ka jaana a busetsa mo tirisong mabotlolo, dithaere, ditshipi tsa ditilo le dikhurumelo tse di latlhilweng. O boletse fa kgwebo e a e simolotse ka madi a go ntshafatsa ditilo. Kgwebo e e tsere maemo a bobedi ko ditshupong tsa matlakala ngwaga ono e tlotlomaletswa seabe sa yone sa go lwantsha tiriso ya polaseteke. BOKHUTLO