19 Sep 2018

Modulasetilo wa khansele ya Kgalagadi, Rre Justice Nkwane o supile fa banana ba le maoto a tshupa go duela mangwe a madi a ba a adimilweng go itshimololela dikgwebo ke ba lephata la banana ka fa tlase ga lenaneo la Youth Development Fund.

Fa a ntsha pego mo bokopanong jwa khansele jo bo simolotseng ka Labobedi, o supile gore ere le ntswa go dirwa bojotlhe go rotloetsa banana go duela, maiteko ao a itaya se fololetse ka jaana bontsi bo sa iponatse go tla go duela.

A re maano a go dira gore ba ba kolotang ba duele a tlhabolotswe ka jaana lephata le ikaelela go ne le gakolola ka go romela melaetsa mo megaleng ya letheka le go etela madirelo.

Modulasetilo o tlhalositse fa lephata le setse le amogetse P4 million yo o itebagantseng le go adima banana go bula dikgwebo.

A re tema e setse e dule ka gore dikopo di le masome a mabedi le boferabobedi di setse di sekasekilwe mme di amogetswe, fa mo go yone palo eo di le lesome le bone go setse go ntshitswe madi a tsone a a fetang P2 million fa tse dingwe di santse di baakanyediwa go neelwa madi.

Rre Nkwane a re mo maitekong a go tlhabolola lenaneo le go thusa banana go tsamaisa dikgwebo sentle, lephata le tsweletse ka go rutuntsha ba ba filweng mananeo ka mokgwa o o siameng wa go tsamaisa madirelo a bone.

A re mmantswitswidi wa go rutuntsha o filwe tiro eo mme o ne a itebagantse le dilo di tshwana le go tsibosa bareki ka kgwebo, go nna le mokwalo o o maleba ka ditsamaiso tsa kgwebo le go dirisa madi sentle.

Mo go tse dingwe modulasetilo wa khansele o tlhalositse gore lephata le tsweletse ka go thusa ba digwebo tse dipotlana le tse di fa gare go rekisa dithoto tsa bone.

A re seo se dirwa ka go tshwara ditshupo mo kgaolong ka bophara go fa barekisi sebaka sa go supa le go rekisa dithoto tsa bone. BOKHUTLO