18 Sep 2018

Mokgatlho wa sekole se sebotlana sa Khudumelapye o o bidiwang Destiny Shapers o ikuetse mo setshabeng go ba thusa go kgona maitlamo a bone. 

Mokwaledi wa setlhopha seo, Rre Senkokame Dibeko o ne a supa mo potsolotsong fa mokgatlho oo o bopilwe ka baithuti ba pele ba sekole se sebotlana sa Khudumelapye ka maikaelelo a go tsosolosa serodumo sa sekole seo ka go rotloetsa maduo a a botoka.

A re mokgatlho oo, o o tlhamilweng ngogola, o setse o ntse le seabe mo ditirong dingwe tsa sekole di akaretsa go aba dimpho ka moletlo wa kaloso baithuti ba ba neng ba ipaakanyetsa lekwalo lwa ntlha. 

O kaile fa thotloetso eo e ka kgonagala ka tshwaragano, botlhaga le bonatla mo malokong a setlhopha seo, mme a re ba ikaelela go nna le seabe mo ditirong tsa sekole tse di akaretsang moletlo wa kabo dimpho, kaloso ya baithuti ba ba ipaakanyetsang lekwalo lwa ntlha le go fa baithuti bogakolodi. 

Rre Dibeko o ne a supa gape fa ba tsere malebela mo mafelong a mangwe a baithuti ba thusang dikole tsa bone tsa pele mme e bile ba atlega. 

O kaile gape fa mokgatlho o, o tlaa dira tseo o tshwaragane le bogogi jwa sekole seo le batsadi gammogo le boeteledipele jwa motse. 

O ne a gwetlha baithuti ba pele go tsenya letsogo mo go thuseng ka se ba alositse e bile bangwe ba tshwere ditiro tse di rileng mo pusong le maphata a a ikemetseng. 

O ne a tlhalosa gape fa mokgatlho wa bone o leka go kokoanya madi a o tlaa thusang ka one mo kabong dimpho ya sekole seo e e tla tshwarwang kgwedi ya Phalane a le 18. 

Rre Dibeko o boletse fa ba amogela thuso nngwe le nngwe mo baithuting ba pele le botlhe ba ba eletsang go thusa. 

O lebogela tirisano mmogo le kamogelo ya mokgatlho ke bogogi jwa motse le sekole seo. 

Rre Dibeko o kopile baithuti ba pele ba sekole seo go tsibogela go ikamanya le thuto ya bomonnaabone ka seo se ka thusa mo go tokafatseng maduo a sekole seo. 

O ne a tlhalosa fa dithuso tseo di ka thusa gape fa go nna le tlhaelo ya didirisiwa tsa thuto. BOKHUTLO