18 Sep 2018

Mapodisi a Kanye a tlhotlhomisa tiragalo e mo go yone bana ba shetseng mo ntlong kwa Kanye bosheng mme yo mongwe a tlhokafala.

Fa a bua mo potsolotsong, mookamela mapodisi a Kanye, Superintendent Mmoloki Mogale a re e ne ya re bosheng ba amogela pego ya molelo kwa kgotleng yoo Ruele mo Kanye.

A re mme yo o dingwaga tse di masome a mararo le bosupa o ne a lotleletse bana ba gagwe mo ntlong ya phiriso maitseboa a re o boa golo gongwe ka pele mme bana ga lemotshega fa ba ne ba sala ba tshameka ka ditlhokwa tsa molelo.

A re mme yoo o ne a tlogela ngwana yo monnye a robetse.

O ne a tlhalosa fa e rile mo go tshamekeng ka ditlhokwa tsa molelo ba di tshubile lengwe lwa wela mo godimo ga bolao mme la fisa kobo, ka jalo ga tlhagoga molelo.

Rre Mogale a re bana bao ba  dingwaga tse tlhano, bone fa yo monnye a ne a le ngwaga le dikgwedi sisupa. 

A re go lemogeng fa molelo o kapile dikobo, bana ba bagolwane ba ne ba kua, baagisanyi ba tsibogela mokgosi wa bone mme ba fitlhela go lotletswe e bile ntlo e phephetha mosi.

Rre Mogale a re beng ba lolwapa ba ne ba bula ntlo eo mme ba kgona go falotsa bana bao, a tlhalosa fa ba bagolwane ba ne ba sa gobala fa e se yo monnye yo molelo o o neng o mo fisitse thata mo maotong. 

A re ngwana o ne a ragosediwa kwa bookelong, kwa e neng ya re moragonyana ka Tshipi ga begwa fa a tlhokafetse. 

O kopile setshaba go ikgapha mo go tlogeleng bana ba banye ba le bosi go sena yo mogolwane mo go bone mo matlong ka bana ba rata go lekeletsa dilo. BOKHUTLO