21 Aug 2018

Banana ba Lehututu kwa Kgalagadi Bokone ba akgoletswe go inaakanya le dikomiti tsa motse go tlhomamisa gore ditiro tsa motse wa bone di gatela pele. 

Mafoko a, a builwe ke Kgosi Kebapatile Montshiwa wa Lehututu mo potsolosong bosheng. 

Kgosi Montshiwa o tlhalositse fa se e se go ntsha fela maduo, mme e le go aga boitsholo jwa bone le go ithuta ka mananeo a puso. 

A re ditiro tsa segompieno di batla maranyane le boitsaanape, ka jalo go ka nna bonolo mo go bone go ka dira ditiro ka maranyane. 

O tlhalositse fa a na le tsholofelo e ntsi mono ngwaga mo komiting ya boipuso e e tsamaisiwang ke banana, a tlatsa ka gore go ya ka pego ya komiti eo bosheng, ba setse ba le malala o laotswe ka dipaakanyo tsa bone. 

A re ba supile fa ba na le maikaelelo a go tla ka methale e e farologanyeng ya go natetsha letsatsi la boipuso, ka moopelo wa dikhwaere,dikgaisano tsa mabelo a ditonki le dijo tsa Setswana le tse dingwe fela jalo tse di ka kgatlhang leitlho. 

Kgosi Montshiwa o ne a kopa bagolo go fa bana ba bone sebaka go tsenelela merero ya ditlhabololo tsa motse, ka jaana e le bone bagogi ba kamoso ba setshaba. 

A re go nna le seabe ga banana mo ditlhabololong tsa motse go ka tsisa ditlhabololo tse di ka tlhabololang matshelo a bone, gape go ka fokotsa borukhutlhi. 

Le fa go ntse jalo, Kgosi o tlhalosiste fa a sa jesiwe diwelang ke bagwebi ba ba gwebang ka ditagi. 

A re le fa ba sa itse bagwebi bao, ba lemotshiwa ke go bona boitsholo jwa bangwe banana bo se bontle, a tlatsa ka gore mokgwa oo wa go gweba ka ditagi o gakatsa dipolaano le borukhutlhi. BOKHUTLO