21 Aug 2018

Tona wa dipalamo le ditlhaeletsano Rre Kitso Mokaila o supile fa mo nakong tse di fetlileng go lemotshegile fa ba ne ba ntse ba kgaphela ba-na-le seabe ba tshwana le morafe mo ditlhabololong tsa metse ya bone.

A re se se ne se dira gore go nne le tiego mo go simololeng tiro. 

Rre Mokaila o ne a bua jaana kwa kgotleng ya Serule fa a ne a ile go begela magosi le morafe rakonteraka yo o abetsweng tiro ya go aga tsela e e golaganyang Tshimoyapula, Mabeleapudi, Paje le Serule. 

A re lephata la gagwe le dira se gore morafe o nne le seabe mo go tlhomamiseng gore tiro e dirwa ka fa go tshwanetseng ka teng. 

Rre Mokaila o ne a supa fa konteraka ya Unik Construction e le yone e e abetsweng tsela ya Mabeleapudi-Serule ya dikhilomitara di le masome marataro le boferabobedi e e tlaa dirwang ka P400 million mme tsholofelo ke gore e bo e wetse mo ngwageng tse pedi. 

Rre Mokaila o ne a rotloetsa dikgosi le morafe go ela tlhoko gore ga go nne le tiego e e ka dirang gore kago ya tsela e bo e ka tsaya sebaka se se leele go feta se se beilweng. 

A re se se ka dira gore puso e tsene mo ditshenyegelong tsa go dirisa madimadi.

O ne a kopa ba ba setseng ba kopilwe go fuduga go dira jalo mo nakong e khutshwane go sutela ditlhabololo. 

Rre Mokaila o ne a supa fa kago ya tsela e tsile go fetola matshelo a batho jaaka ba dikgwebo tse dipotlana. 

O ne a tlhalosa fa ba tlaa kgona go tshetsa ba malwapa a bone. 

O ne a kopa ba ba tlaa nnang lesego go thapiwa mo tirong go itshwara sentle le go dirisana le rakonteraka gore tiro e kgone go dirwa go sena dikgogakgogano. 

Tona Mokaila o ne a supa gore ditlhabololo fa di dirwa go na le tse dintle le tse di maswe, mme a kopa morafe wa Serule go ipaakanyetsa dikgwetlho tsa go nna jalo mme tse dingwe ba kgone go di tila gore di seka tsa ama matshelo a bone. 

Rre Mokaila a re tumalano e e dirilweng ke Tautona Mokgweetsi Masisi le ba a berekang le bone ke gore go berekwe ka thata gore ditlhabololo di kgone go goroga kwa setshabeng.

O ne a supa fa lephata la gagwe le tshwere ka thata go aga ditsela tsa boleng jo bo kwa godimo tse di tlaa golaganyang lefatshe ka bophara. 

A re go dira jalo go tlaa dira gore batho ba kgone go tsamaya ka nako e ba e batlang go sena dikgoreletsi dipe ,a supa fa puso e na le mogopolo wa gore mo dingwageng tse ditlang lephata le bo le ka itsenyetsa madi ka go duelelwa ga ditsela. Mokwaledi wa lephata la dipalamo le ditlhaeletsano Rre Kabelo Ebineng o ne a supa fa se e le tshimologo ya therisano le morafe wa Serule mme ba tla a tswelela ba ba lekodisa ka fa tiro e tsweletseng ka teng. 

O ne a ba kopa go nna leitlho la puso go bega sengwe le sengwe se se ka tswang se belaetsa. 

Phuthego e ne e tsenwe ke mopalamente wa Serowe Bokone e bile e le mothusa tona wa lephata la dikgaolo le tlhabololo magae, Rre Kgotla Autwetse le bagolwane ba bangwe ba puso. BOKHUTLO