20 Aug 2018

Banni ba dikgaolwana tsa Kabakae, Kgaphamadi le Khurakhura mo kgaolong ya Ghanzi Botlhaba ba kgothaditswe go kwadisa ditsha tsa bone e le tsela ya go fefosa ditlhabololo. 

Mafoko a, a builwe ke modulasetilo wa komiti ya khansele-potlana ya Ghanzi Botlhaba, ebile e le mokhanselara wa kgaolwana ya Kabakae, Rre Bashi Thiite fa a buisa diphuthego tsa kgotla mo dikgaolong tseo bosheng.

Rre Thiite a re kwadiso ya ditsha e botlhokwa ka e thusa mo go direng mealo ya ditlhabololo tsa motse. 

A re maikaelelo a diphuthego tsa gagwe e ne e le go lemotsha Batswana botlhokwa jwa go kwadisa ditsha le go ba itsise fa khansele e similotse go ba direla ditlankana (title deed) mahala. 

Rre Thiite a re diphetogo tse di tlaa thusa Batswana go ka dirisa ditsha tsa bone go adima madi mo makalaneng a a farologaneng a puso, a a ikemetseng le go dirisa mananeo a tshwana le la SHHA go tlhabolola ditsha tsa bone. 

O tlhalositse fa lenaneo la SHHA le ka thusa Batswana go aga matlo ba tshwaragane le Botswana Housing Cooperation (BHC) kana (Turnkey) le le thusang ka madi a a kanang ka P90 000 le la go tlhabolola dikago le le thusang ka madi a P60 000 otlhe a duelwa mo lobakeng lwa dingwaga tse di masome mabedi. 

Le fa go ntse jalo, o ne a supa fa a tshwenngwa ke banana ba a reng ba goga maoto go ikopela ditsha, a re e re le ntswa motse wa Ghanzi e na le batho ba ba emetseng go bewa ba feta dikete tse nne, banana ba tshwanetse go tlhagafalela go ikopela ditsha.

 A re mo nakong eno motse o setse o na le ditsha tse di potietsweng di le sekete le makgolo a marataro, tse e tla reng morago ga khansele e sena go bona madi a go isa ditlamelo kwa go tsone, e bo e baya banni. 

A re mo ditsheng tse go akareditswe tsa dikereke, dikgwebo, madirelo ga mmogo le bonno. 

Rre Thiite o ne gape a gakolola batsadi go tsibogela dikgang tsa go kgaoganya boswa ka bonako le ka keletlhoko go itsa go losa bajaboswa, a re se se ka thusa go fokotsa dipalo tsa ditsha tse di sa kwadisiwang le tse di sa tlhabololwang. 

Rre Thiite o ne a gakolola ba ba adimeleng madi a SHHA go aga le go tlhabolola ditsha tsa bone le go a busa, ka lenaneo le le diretswe go thusa Batswana, mme madi one a ba a busang ke one a a adimiwang ba bangwe gore le bone ba itlhabolole. 

Fa a tswa la gagwe, mogolwane go tswa kwa lephateng la SHHA mo Ghanzi, Mme Motsei Moutswi o ne a gakolola banni ba dikgaolwana tseo go dirisa diofisi tsa bone, ka e bile maikaelelo a bone e le go rurifatsa fa Batswana ba na le bonno. 

Fa ba ba kgwa dikgaba, banni ba ne ba supa fa ba sa itumedisiwe ke lobaka lo loleele lo ba lo nnang ba sa bewe ditsha, ba re se se baka gore ba felele ba nna le batsadi ba bone mo malwapeng. 

Ba kopile gore mo peong ya ditsha e e latelang, go nne le thulaganyo e e faphegileng e le go akaretsa ba-na-le bogole ga mmogo le ba ba tlhokileng lesego mo setshabeng. BOKHUTLO