13 Aug 2018

Kgosi Tlhabologang Hube wa Sojwe kwa kgaolong ya Kweneng a re ga ba robadiwe ke dikgang tsa bogodu jwa leruo jo bo atileng mo kgaolong ya gagwe.

Kgosi Hube o kaile fa barui ba tshwenngwa ke magodu a a utswang dikgomo, ditonki le dihutshane.

Kgosi Hube o ntshitse selelo sa gagwe mo potsolotsong le BOPA, a tlhalosa fa barui ba kgaolo eo jaanong ba lela sa ga ragele ka jaana magodu a utswa dikgomo go di tlhaba ba rekisa dinama, fa marole one ba a rekisetsa batho ba ba batlang dikgomo tsa bogadi.

O tlhalositse fa dihutshane di utswiwa thata fa mananeo a puso a tshwana le la nyeletso lehuma a buletswe ka magodu ba gabile go dira madi.

Le fa go ntse jalo, o kaile fa mapodisi le morafe ba eme ka dinao go lwantsha bogodu jwa leruo mme a kopa barui go tsosolosa ditlhopha tsa barui ga mmogo le go tlhokomela leruo.

Mo go tse dingwe Kgosi Hube o ne a supa fa go na le bangwe batho ba ba rekisang majalwa a sekgoa mo malwapeng kgatlhanong le molao wa majalwa a go nna jalo a a tshwanetseng go rekisediwa kwa dibareng ka diteseletso.

O ne gape a supa fa bangwe barekisi ba majalwa a mo malwapeng ba sa tlotle dinako tsa thekiso e bile modumo wa diletso o sa robatse banni.

Kgosi Hube o boletse gape fa motse wa gagwe o tlhaelelwa ke boroko jwa badirela puso bogolo jang ka maphata a puso aa direlang koo a le mokawana.

Kgois Hube o ne a tswelela a supa fa botlhoka tsebe jwa baithuti bo santse bo tshwenya fela thata kwa sekolong se segolwane sa Matsheng mo e bileng bogogi jwa sekolo bo kile jwa mmitsa go ya go kgalemela baithuti mme a re go na le bangwe ba e santseng ele maidi.

Kgosi Hube a re baithuti ba amega mo dikgannyeng tsa go dirisa ditagi le go nwa bojalwa mme a kopa batsadi go tshwaraganela bana le bogogi jwa sekolo go lwantsha botlhoka tsebe.

A re seemo sa sekolo sa Matsheng ga se jese diwelang, a re dikago tsa sone di tlhoka go tsibogelwa go tlhabololwa ka se le mo seemong se se sa siamang.

O supile fa go tlhabolola thuto ya ngwana go le botlhokwa ka go tshwana le go beeletsa, ka jalo dikgang tse di amang thuto di tshwanetse go tsewa ka tlhoafalo. ENDS