10 Aug 2018

E re ka tshaba e senang ngwao e le moka e latlhegileng’, tshomarelo ngwao e kailwe fa e le botlhokwa mo go ageng tshaba e e bopaganeng e bile e na le ponelopele.

Fa bagolwane ba Kanye ba rotloetsa tshomarelo ngwao ka go gasa molaetsa mo diphuthegong tsa kgotla, go abo go na le monana a ikemiseditse go dira jalo ka poko.

Mo potsolotsong le BOPA, mmoki wa monana Rre Edwin Moroka o ne a tlhalosa fa poko mo go tlholegeng  e le yone motlobo wa go tshegetsa ngwao.

‘’Poko e re sedimosetsa se re leng sone re le setshaba, re ipela ka poko e le mongwe mokgwa wa go itlosa bodutu le go rutana maele a botshelo,’’ Rre Moroka a tlhalosa.

Rre Moroka o boletse fa motho a ka ithuta go le gontsi mo pokong, a kaya fa poko e rotloetsa, e ruta e bile e gakolola, a tlhalosa fa poko e kopanya merafe, le gone go itse kwa ba go tswang e le setshaba.

‘’Re ithuta ka ditso tsa rona re le morafe, re gakologelwa kwa re go tswang e bile poko e rotloetsa tirisanyo mmogo ya merafe,” Rre Moroka a tlhalosa.

Go sa le foo, Rre Moroka o tlhalosa fa go le botlhokwa go somarela ngwao ka dipina le meletlo ya setso. “Dipina le meletlo ya Setswana ke tsela nngwe ya go somarela ngwao, fa merafe e kopane e supa ditso tsa bone re ka ithuta thata mo go se, ka jalo ngwao e ka seke ya tsamaya e nyelela,” go bua Rre Moroka.

A re poko ke neo e a e abetsweng ke Modimo, ka jalo a bona go le mosola go ikokotlela ka yone, a tlhalosa fa a gwetlhilwe ke go lemoga fa mhama wa poko le ngwao di latlhegelwa ke boleng mo dinakong tsa segompieno.

Go le jalo, Rre Moroka o tlhalositse fa bontsi jwa baboki ba segompieno e le baboki ka gore ba bone sebaka sa dikgaisano ba gabile dituelo mme tota e se baboki ba boammaaruri. ‘’Tota baboki malatsi ano ba inaakantse le go dira madi, se se dira gore baboki ba tlhwatlhwa ba lebelwe kwa tlase e bile go bolaya seriti sa poko le yone ngwao, Rre Moroka a bolela.

A re o tshwenngwa ke gore beng-gae ga ba somarele ngwao a tlhalosa fa ngwao e tswapolwa ke sesha le tlhabologo e nsti ka jalo batho ga ba e tsee tsie thata.

Rre Mokoka yo e reng a ipoka a re ke mmoki wa ‘Setswana sa Mmakgomosaboloko, Morwa Nato a Moroka a Dira a Selomi a Matlwe a Matlhono, Mmina kgomo tshwaana e ditse sesweu,’ o tlhalositse fa a simolotse go boka kwa sekoleng se segolwane sa Mathiba kwa Kanye go fitlhelela a tsena mo go se segolo sa Seepapitso gone kwa Kanye.

Rre Moroka a re botsipa jwa go boka o bo amule mo go Rraagwemogolo jaaka a ne a mo reetsa fa a boka dipelesa di lema fa a sa le monnye a kaya fa  a ne a rata go boka le dikgomo le dipodi fa di bolola le fa di goroga.

E re ka go le botlhokwa go amogana thuto le ba bangwe, Rre Moroka a re o rutuntsha ka ngwao ya Setswana kwa Duma FM, fa e sa le ka 2015 mo thulaganyong ya Sefalana sa Ngwao.

O rotloeditse monana yo o nang le kgatlhego ya go nna mmoki go ikopanya le baboki ba ba maleba go mo gakolola. Bokhutlo