08 Jul 2018

Mme Kgomotso Kesekang, yo o dingwaga tse di masome mane, ke monngwe wa ba ba akotseng lenaneo la banana go simolola kgwebo ya kapei ya borotho.

Mme Kesekang o tlhalositse fa a ne a seka a ipona tsapa go ikgolaganya le ba lephata la banana go kopa dithuso le go tsaya bogakolodi ka lenaneo le.

A re kopo ya gagwe e ne ya atlega mme a thusiwa ka P100 000 go simolola  kgwebo e a reng e gaufi le pelo ya gagwe e bong ya go apaya  borotho.

O tlhalositse mo potsolotsong fa a thusitswe ka 2013 mme a simolola madirelo a Charlla Bakery ka 2014.

Charlla ke lefoko la Segerika le le rayang phaphatha.

O tlhalositse fa a tswa kgakala a rata go apaya borotho e bile a kile a bereka mo lebentleleng la Spar, mo kapeing ya borotho.

A re se se ne sa mo thusa le go mo neela sebaka sa go ithuta go le gontsi ka kapei ya borotho.

A re morago ga go tlogela tiro o ne a dira ditshekatsheko kwa Ntlhantlhe ka kgwebo ya borotho, mme a lemoga fa e ka mo tlodisa dinokana ditletse.

O ne a supa fa kgwebo e simolotse e dira sentle mo mmerakeng ka a ne a na le bareki ba ba popota le fa gompieno e wetse tlase ka ntlha ya go tlhoka go ipapatsa sentle.

O tlhalositse fa kgwebo e ikaegile ka go rekisetsa sekole se sebotlana sa Ntlhantlhe dilofo di le 49 beke le beke le batho ka bonngwe ka bonngwe mo motseng.

O tlhalositse fa a bapatsa kgwebo ya gagwe ka go bua le batho ka yone gongwe le gongwe kwa a yang teng, e bile a tsweletse ka go batla methale e mengwe ya go e bapatsa.

A re go le gantsi batho fa ba na le mediro e tshwana le manyalo le mekete ka go farologana, ba reka bopi jwa borotho ba bo ba mo neela gore a ba apeele jaaka ba eletsa.

Mme Kesekang o kaile fa a thapile monana a le mongwe.

A re fela jaaka dikgwebo tse dingwe, Charlla Bakery e lebanwe ke dikgwetlho di tshwana le go tura ga didirisiwa ga mmogo le go tlhoka koloi go tsamaisa kgwebo ka thelelo.

A re lorato, bopelotelele le thotloetso go tswa go ba lelwapa la gagwe ke tsone tse di mo gwetlhang e bile di mo tiisa gore a tswelele pele mo kgwebong.

Mme Kesekang o ne a fa a gakolotse banana ba ba nang le keletso ya go simolola dikgwebo ka lenaneo la banana gore ba kope dikgakololo pele ga ba ka simolola. BOKHUTLO