28 Jun 2018

Botshelo jwa segompieno jo basha ba bo tshelang le ditlhabologo dingwe di fetola ngwao e Batswana ba tshwanetseng go ipelafatsa ka yone.

“Ngwao e a nyelela mme batho ba itlhokomolositse seo,” seo se builwe ke kgosi wa Zoroga, Thomas Modiro mo potsolotsong bosheng.

A re dijo tsa Setswana tse di siametseng botsogo ga di sa tlhole di jewa ka bontsi ka ntlha ya dijo tsa sesha tse gape di bakang malwetse. 

A re Batswana ka bontsi ba bonela dijo tsa Setswana mo mabentleleng le mo mebarakeng ka ba sa tlhole ba na le kgatlhego mo go tsone. 

Kgosi Modiro a re metshameko ya Setswana jaaka morabaraba, mhele, diketo, koi le tse dingwe tse di neng di tlosa bodutu gammogo le go sedila mmele di nyelela ka monokela.

A re metshameko e e ne e ruta bana go bala ba santse ba le bannye gammogo le go ba shafatsa tlhaloganyo.

O tlhalosa fa meila e e neng e dirisiwa go sireletsa batho le tikologo ka kakaretso  gape e ne e aga setho sa motho e itlhokomolositswe. 

O supile fa kapari ya tshega le diaparo tsa matlalo di sa tlhole di tlotlwa jaaka pele. 

O tlhalositse fa bogologolo monna a sa apara tshega o ne a sa ikutlwe a le motlotlo ka ba ne ba dumela fa monna a ne a tshwanetse go disa ka tshega. 

Kgosi Modiro a re se se utlwisang botlhoko ke go bona bana ba gola ba sa itse diteme tsa morafe wa bone mo e leng gore go nyeletsa diteme mo isagong ya lefatshe leno.

A re Batswana ba ba santseng ba bua Sesarwa ke bagolo ka banana ba ganeletse mo sekgoweng le Setswana fela. Kgosi Modiro o rotloetsa Batswana go boela marakanelong go ya go sala ngwao morago gammogo le go itlotlomatsa ka yone. BOKHUTLO