27 Jun 2018

Baagi ba masimo a Semarule mo kgaolong ya Kweneng ba sa tswa go simolodisa  mokgatlho le go tlhopha khuduthamaga ya komiti ya tshomarelo matlotlo le di-tsa tlholego.

Fa a rola pego mo phuthegong ya kgotla e e neng e tshwaragane le go tlhopa maloko a khuduthamaga le tshimolodiso mokgatlho oo ka labone, motsamaisa dithulaganyo wa tshimolodiso mokgatlho o, Rre Moremi Gabanagae o tlhalositse fa banni ba masimo a Semarule le metse e e mo tikologong, ba ne ba bona go tshwanela go simolodisa mokgatlho oo ka o ka ba thusa go oba letsogo le go somarela meamuso ya tlholego e e fitlhelwang mo kgaolong ya bone.

Rre Gabanagae o ne a supa fa mokgatlho o o tlaa tsamaisiwa ke khuduthamaga ya maloko gotsweng mo metseng ya Mmanoko, Gakgatla le masimo a Semarule, Ramakgatlanyane, Tshiping le Mantsho.

A re kgaolo ya bone e humile di-tsa tlholego di akaretsa melapo e e humileng motlhaba o o ka dirisiwang mo go tsa kago, majwe a a ka dirisiwang go dira motlhaba le konkoreiti le letamo la mmadikgarubane le le humileng ditlhapi, a kaya fa mokgatlho o o tlaa thusa thata mo tshomarelong ya di-tsa tlholego.

O supile fa mokgatlho o o tlaa itebaganya le go hema go bapalwa sesolo ga meamuso eo ke bafeti ka tsela mme setshaba se se mo tikologong ya di-tsa tlholego tseo sone se sa akole sepe mo go yone.

O tlhalosa fa mokgatlho oo jaanong o tlaa nna  matlho a morafe go bona gore matlotlo  le meamuso di solegela morafe molemo ka go tsenya letseno le le tlaa thusang go tsisa ditlhabololo mo tikologong ya bone.

Fa a ba ema ka lefoko, kgosi wa Gakgatla Rre Lenyetse Moshapa o ne a kgothatsa maloko a khuduthamaga  go tlotla nako ka e le botlhokwa, a tlhalosa fa e le yone e thubileng mekgatlho ka bontsi.

‘‘Go sa tlotle nako ke mmaba yo mogolo ka jaana fa e sa tlotlwe go ka felela go nyemisa moko maloko a a tlhaga,’’ kgosi Moshapa a tlhalosa.

Kgosi o ne a tswelela a ba kopa go rerisana le morafe fa go tla mo go tseeng ditshwetso ka jaana morafe e le one o ba romileng.

O ne a  boa a kopa morafe go tshwaragana sentle le khuduthamaga ya mokgatlho oo gore go tle go nne le maduo. BOKHUTLO