20 Jun 2018

 Mapodisi a Moshupa a kopa setshaba, segolo jang babereki ba madirelo a paakanyo ya dikoloi go ba thusa go tshwara mokgweetsi wa koloi e e thudileng ya ba ya baka loso lwa monna mongwe wa dingwaga tse di masome mararo wa kgotleng ya Jerusalema  mo Moshupa. 

Ass supt Joel Sebotho o buile  mo potsolosong bosheng gore mokgweetsi o ne a inaya  naga morago ga tiragalo eo. 

A re  setshaba se ka ikgolaganya le mapodisi ape fela a a gaufi fa go nale yo ba mmelaelang. 

Rre Sebotho o tlhalositse fa ba ne ba amogela pego ka mofeti le tsela ka phirimane ya letsatsi la Matlhatso fa monna mongwe a rapaletse fa gare ga tsela ya A10 kwa kgotleng eo. 

A re mapodisi a ne a ragogela kwa lefelong la tiragalo mme ba feta ba tsaya rre yoo ba mo ragosetsa kwa kokelwaneng ya Sabata mo Moshupa kwa ngaka e fetileng ya tlhomamisa fa a setse a tlhokafetse. 

Rre Sebotho otlhalositse gore ba itemogetse fa dikotsi tsa tsela ya A10 di ile magoletsa, ka jalo o kopile ba-tsamaya ka dinao ga mmogo le bakgweetsi go nna kelotlhoko fa ba e dirisa. 

Rre Sebotho a re tsela eo e dirisiwa ke bakgweetsi ba ba farologanyeng mme a re o itemogetse gore bangwe ba feta ka lebelo le le kwa godimo le ntswa tsela e ralala motse, selo se se felelang se baka dikotsi. 

Rre Sebotho o kopile bakgweetsi go nna podi matseba ka dinako tsotlhe fa ba dirisa tsela.

A re seo se ka boloka matshelo a bone le a Batswana ka kakaretso. 

O boletse fa ditlhotlhomiso tsa mapodisi di santse di tsweletse mme maina a moswi a santse a lobilwe go fitlhelela ba masika ba itsesiwe. BOKHUTLO