17 Jun 2018

Mogokaganyi wa lenaneo la thibelo ya mogare go tswa kwa go mmangwana go ya kwa leseeng (PMTCT) kwa Ngami District Management Health Team, Mme Keamogetse Maphane a re lenaneo le le na le maduo a a itumedisang mo go lwantsheng mogare.

Mme Maphane o rotloeditse bomme ba ba itsholofetseng go itlhatlhoba le go tsenelela lenaneo le go sale nako.

O buile jalo kwa letsatsing la go tsibosa setshaba ka lenaneo leo.

Tiro e e ne e rulagantswe ke ba kokelwana ya Boseja/Kubung le Maun e kopantswe le go ipelela letsatsi la banana mo Maun.

A re go botlhokwa go fa bana ditlamelo tsa botsogo ka ke tshwanelo ya bone, e bile a re batsadi ba ba itsang bana tshwanelo eo ba tlola molao.

Mme Maphane a re dipatlisiso di supa fa dipalo tsa bana ba ba tsholwang ba na le mogare di ile tlase ka ntlha ya lenaneo leo.

Fa lenaneo le simologa, tlhatlhobo e ne e dirwa ngwana a na le ngwaga le a le ngwaga tse pedi, mme morago ga fetolwa gore lenaneo le le nne le maduo a a tseneletseng ka go tlhatlhoba bana ba le dibeke tse thataro, dikgwedi tse thataro, ngwaga le ngwaga tse pedi.

Mme Maphane a re diphetogo tseo di dirile gore lenaneo leo le atlege.

A re go le pele bana ba le masome mararo mo lekgolong ba ne ba tsholwa ka mogare mme jaanong seo se fetogile.

Ka jalo o ne a gwetlha batsadi go dirisana le ba bongaka, a re go botlhokwa gore bana bao ba dirwe ditlhatlhobo tseo tsotlhe go netefatsa fa mogare o seyo, kgotsa go tsenya ngwana mo lenaneong la diritibatsi fa mogare o le teng.

Mme Maphane o ne gape a rotloetsa bommabana go tlhokomela dikarata tsa bana tsa botsogo, a re dikarata tseo di botlhokwa ka di kaela batsadi ka malwetse a a amang bana.

A re go molato go kgagola pampiri nngwe mo karateng ya ngwana, a re seo se tlwaelesegile mo tsebeng e e nang le seemo sa mogare sa batsadi.

A re batho ba ka sekisediwa go kgagola sedirisiwa sa puso.

O supile gape fa bomme ba ba sa itlhatlhobeng fa ba le baimana ba baya masea a bone mo diphatseng tsa go tsenwa ke mogare.

A re ba bongaka ba na le tetla ya go tlhatlhoba ngwana le fa mmangwana a seyo.

Mme Maphane a re go botlhokwa go fa bana tlhokomelo e e rileng gore ba nne le bokamoso jo bo siameng.

Mooki kwa kokelwaneng ya Boseja/Kubung, Mme Keitumetse Motsholapheko a re maikaelelo a letsatsi leo ke go rutuntsha batho ka botsogo jwa bana, bogolo jang ka thibelo ya mogare.

A re go tlhokafala gore bana ba nne le botsogo jo bo itekanetseng.

Letsatsi leo le ne gape le na le metshameko ya bana, le go itlhatlhobela malwetse a a farologaneng ke bagolo.  BOKHUTLO