10 Jun 2018

Banni ba Mosweu ba lela ka tiego ya go rarabololwa ga kgang ya bogosi jwa bone.

Mo potsolosong le BOPA, banni ba boletse fa motse wa Mosweu o digela dingwaga tse nne o ntse o sena kgosi morago ga go ithola marapo ga ga Kgosi Otsweletse Dingalo ka mabaka a bogodi.

Kgosi wa Seolwane, Rre Mhaladi Mhaladi III, yo o okametseng merero le bogosi jwa Mosweu, o tlhalositse mo potsolosong fa bogosi jwa Mosweu e le jo bo tsalelwang e se jwa ditlhopho.

O ne a supa fa seo se ne sa baka tiego ya go dira thulaganyo ya yo o tlaa tlhatlhamang Kgosi Dingalo. 

O boletse fa kgang ya bogosi jwa Mosweu e diiwa ke banni ka ba sa dumalane le ditshwetso dingwe tse di tserweng ke ba bogosi.

 O tlhomamisitse fa a tlaa baya letsatsi le mo go lone a tlaa kopanang le banni ba Mosweu a patilwe ke Kgosi Gobusamang Mapena wa Maunatlala go utlwa dingongorego tsa bone mme morago go tsewe ditshwetso tse di maleba.

O ne a tlhalosa fa ditiro tsa bogosi mo motseng oo di santse di tsamaisiwa ke Kgosi Comet Baitlhapi wa kgotlana ya Molosiwa ka e le ene a tlhomamisitsweng ka fa molaong ke ba merero ya tsa selegae. ENDs