06 Jun 2018

Moeteledipele wa komiti ya baithuti ya sekole se sebotlana sa Dinokwane kwa Serowe, Pearl Machona o kopile go thusiwa ka  koloi kana kara ya ditonki e e ka tlhofofaletsang bana ba sekole seo mosepele go ya sekoleng.

Pearl o buile jaana fa sekole seo se ne se abelwa dimpho ke ba lephata la thuto mo Serowe.

Sekole se ne se abela bana bao dimpho tsa mariga.

Moithuti yo, o ne a re baithuti bangwe kwa sekoleng sa bone ba nna kwa masimong a Masama, ka jalo ba tsamaya sekgala se seleele  go ya sekoleng mo ba felelang ba tsena ba lapile, mme  seo se ame thuto ya bone.

“Ba  kgona go tsena morago ga nako mo sekoleng fa gongwe ba nelwe ke dipula, dibuka tsa bone le tsone di kolobile.”

O ne a re baithuti ba, ba na le kgwetlho ya metsi mo ba felelang ba ya sekoleng ba sa tlhapa, selo se se sa siamelang botsogo jwa bone.

A re go supafala fa batsadi ba bangwe ba itlhokomolositse tlhokomelo ya bana.

Mogolwane go tswa kwa ofising ya thuto mo Legare, Rre Sonny Mooketsi a re  e le ba thuto go tswa kwa moding ba leboga kamano ya bone le sekole sa Dinokwane.

A re e le lephata ba ne ba lemoga fa go na le  letlhoko mo sekoleng seo mme ba itlama go thusa fa ba ka  kgonang teng, gore bana  ba ba nang le letlhoko ba seka ba bonala fa ba na  le ba bangwe.

Rre Mooketsi a re badiri ka ene ba ne ba ntsha madi a bone ka lerato mme ba kokoanya P6 336 go rekela bana ba le masome mararo le borataro ba ba nang le letlhoko dimpho di tshwana le dikausu tsa sekole, mebese, diatlana le disekafo go itshireletsa mo serameng.

O kopa batho ba ba nang le bokgoni go tswelela ba thusa fa ba kgonang teng  gore bana ba ba tswelele ba ntshe maduo a a botoka.

Rre Mooketsi a re go supafetse fa bana ba ba tswang kwa  Masama ba ntsha maduo a a botoka kwa.

E rile a aba dimpho tseo, Mme Julia Ramalepa  a re, ‘Amogelang mpho e ka lorato ka gore e ntshitswe ka lerato’.

Fa a ntsha mafoko a malebo, mokhanselara wa Newtown, Rre Bethuel Botumile o ne a re o utlule selelo sa ga Pearl sa letlhoko la sepalamo.

O ne a leboga ba lephata la thuto  go bo ba bone go le  botlhokwa go abela bana ba sekole sa Dinokwane ka gore  ke sengwe sa dikole tse a ikgantshang ka tsone mo kgaolong ya gagwe ya botlhophi ka  se ntsha maduo a  mantle.

Rre Botumile a re o tlaa bua le ba khansele gore ba ba thuse go ba gopela lebala gore ba tle  ba kgone go ikatisa sentle. BOKHUTLO