05 Jun 2018

Banni ba kgotla ya Lodubeng kwa Kanye ba amogetse Rre Thapelo Sane ka tsoo-pedi botsheng, go nna kgosana ya bone, ba tlhalosa fa ba sa bolo go nyorelwa gonna le moeteledipele.

Banni ba ntshitse malebo morago ga tekodiso ya ga Rre Thatayaone Lore ka peo eo.

Rre Lore, yo e leng mongwe wa boralekgotla ba kgotla ya ga Taukobong, a re ba lemogile fa kgotla ya Lodubeng e godile mme e tlhokana le moemedi wa bogosi.

Rre Lore a re e le ba ntlo ya ga Kgosi Kuto ba ne ba kopana ba bo ba sekaseka leina la yo o ka emelang kgotlana eo, mme ba dumalana ka leina la ga Rre Sane.

A re ba ne ba neela ba ga Taukubong leina leo ba le amogela mme ya re morago ba le isa kwa go Kgosikgolo Malope II mme le ene a le atla.

Moemela kgosikgolo, Rre Kgotlaetsile Sane o ne a tlhomamisa fa moemedi wa ga Taukobong a ne a ya kwa go kgosikgolo go mmolelela fa banni ba Lodubeng ba kopa moemedi.

Rre Sane a re kgosikgolo o ne a dumalana ke sone se ba boneng go tshwanela go ya go begela banni ba Lodubeng leina la yo o tlaa ba etelelang pele, a ba a re o tlaa boa a tla go ba mmegela tona yo o maleba a sena go fetola.

Ya re a ba kgwa dikgaba, Mme Khumoetsile Banankoko a lebogela gore jaanong ba tsile go nna le Kgosana a re ke selo se a sa bolong go se letela.

A re go kile ga twe ba neelwa kgosana ya kgotla ya Kgwakgwe ba mo gana mme a re o lebogela go bo ba neetswe yo e leng wa bone.

A re ba tsile go dirisana le ene go tlhabolola Lodubeng.

Mongwe wa batsena-phuthego, Mme Tirelo Galotshoge le ene a supa fa a phophoma ka boitumelo.

O tlhalosa fa ba na le lobaka lo lo leele ba sena moeteledipele mo kgaolong ya bone.

Fa a ntsha la gagwe, Kgosana Kgosiyabotlhe Setlhatloso a re kgotla ya ga Taukobong e fologa kwa Ntsweng kwa jaanong e leng Goo-Maoto.

A re go ne go bapile le Kgwatlheng pele ga le yone e fuduga.

Rre Setlhatloso a re ka nako eo, kgotla ya Kgwatlheng e ne e le fa go leng goora Mokgosi gompieno.

A re ba ga Taukobong ba dule kwa Ntsweng ba sutela boo-Maoto.

A re ba ne ba kile ba leka go gana go suta mme Kgosi Bathoen a ba kopa go sutela bomogoloabone.

Rre Setlhatloso a re mo nakong eno ba a leboga ka jaana ba na le lefatshe le le atlhameng. O supa fa kgotla ya ga Taukobong e felela kwa Lodubeng.

E rile a amogela thomo, Rre Sane a supa fa a sa ithute boeteledipele.

O tlhalosa fa a tle a buise diphuthego tsa kgotla, mme a lebogela ka fa banni ba mo amogetseng ka teng.

Rre Sane a re o itse matshwenyego otlhe a bone a ba a rurifatsa fa thulaganyo ya go aga loobo mo kgotleng eo e tlaa tswelela. BOKHUTLO