03 Jun 2018

Mapodisi a Kanye a tlhotlhomisa tiragalo e mo go yone Mme mongwe wa dingwaga tse di masome a ferang bobedi le botlhano a thubeditsweng ke borre ba bararo makuku bosheng kwa Lotlhakane Botlhaba.

Mo potsolotsong, mookamela mapodisi a Kanye, Rre Mmoloki Mogale a re borre ba bararo bao ba ne ba tsenenlela mme yoo mo ntlong ka a ne a nna a le nosi mme e bile a sa lotlela.

A re ba ne ba keteka mme yoo le go mo kgama go fitlhelela a idibala mme ba itseele dikobo ka dikgoka.

Rre Mogale a re mme yoo, o ne a itharabologelwa Mosupologo mo tshokologong morago ga dijo tsa motshegare mme a ya go begela mapodisi tiragalo eo.

Morago ga go begela mapodisi, Mme yoo o ne a ragosediwa kwa kokelong kwa a neng a tlhotlhojwa ke dingaka, a supa fa ba itshwaragantse le ba ofisi ya boipelego go sedila mme yoo maikutlo.

O tlhalositse fa ba le mo patlong la babelaelwa, mme o kopile setshaba go ba thusa go ba batla.

E re go le jalo, Rre Mogale o tlhalositse fa e ne ya re Motsheganong a tlhola malatsi a le masome mabedi le bosupa ba amogela kgang e nngwe ya petelelo kwa kgotleng ya ga Mafhikana.

O boletse fa mme wa dingwaga tse di masome a mane le boferabongwe a ne a betelelwa a le kwa maitisong bosigo.

A re mme yoo o ne a gogwa ke borre ba babedi go bapa le lebala la metshameko la Swallows mme ba feta ba itseela dikobo ka dikgoka ba bo ba mo amoga mogala wa lotheka.

O boletse fa mme yoa a sa lemoga badiri ba tiragalo eo ka a ne a iphetisitse dino.

Ka jalo dilalome tseo ga di ise di tshwarwe.

O ne a kopa setshaba go ba loma tsebe ka ope fela yo ba belaelang e le ene modira molato.

O gakolotse bomme go ikgapha mo go tsamaeng ba le nosi bosigo. BOKHUTLO