24 May 2018

Go setse go fetile dingwaga tse pedi Kgosi Kgari III a boloditse letsholo la go lwantsha botlhoka tsebe mo baneng ba dikole kwa Molepolole.
Ba-na-le seabe mo letsholong leo ba akaretsa makalana a tshwana le mapodisi, ba boipelego, dikgosana le baeteledipele ba dikole tse dikgolwane.
Mo potsolotsong, Kgosi Kgari III o tlhalositse fa letsholo leo le le bidiwang Kweneng Stakeholder Engagement Framework le maikaelelo a lone e leng go tshwaragana le maphata ka go farologana go rotloetsa bana ba dikole go tlhoafalela thuto, le dirile diphetogo tse di bonalang mo dikoleng.
O kaile fa ba ne ba tshwentswe ke boitsholo jwa bana ba dikole mo Molepolole ga mmogo le go tlhoka go dira sentle mo dithutong. Kgosi Kgari III o supile fa tiro ya lekoko leo e le go kgalema, go rotloetsa boitsholo jo bontle ga mmogo le bogakolodi jwa boitseanape.
E ne ya re a tswa la gagwe ka letsholo leo, mogokgo wa sekole se segolwane sa Kgari Sechele, Rre Lapologang Kolagano a tlhalosa fa e ne ya re ka 2015 a kopana le Kgosi Kgari III ka matshwenyego a go sa tsena sekole sentle ga baithuti.
A re seo se ne se akaretsa go ngwega ga baithuti mo sekoleng bangwe ba fitlhelwa ba anwa bojalwa ka nako ya sekole, le go lwa mo dintweng tsa digongwana.
Rre Kolagano o ne a supa fa e ne ya re ka one ngwaga oo a nna le lesego la go tsenelela phuthego ya bagokgo ba dikole tse dikgolwane tsa mafatshe-fatshe kwa Finland, mme kgang ya moruthutha ya bo e le tshwaragano mo thutong ya bana.
O supile fa dintlha dingwe tsa phuthego eo di ne di lemotsha fa tshwaragano e nonotsha boleng jwa thuto ya ngwana, mme e bile mo-na-le seabe mongwe le mongwe mo thutong ya ngwana a tshwanetse a bo a itse se se tlhokafalang. Rre Kolagano o kaile fa a ne a abelana le Kgosi Kgari III se a neng a tswa go se kwatabolotsa kwa phuthegong eo, a bo a rurifatsa fa kgosi a ne a amogela mogopolo, o ka jalo ba semelela mo go direng tsamaiso ya lenaneo le le tsepameng leo.
O ne a kaya fa Kgosi Kgari III a ne a kgaoganya dikgosana tsa gagwe ka dikole tse dikgolwane tsa Molepolole gore ba ye go bereka le tsone ba leke go tswa ka ditharabololo tsa mathata a a ka tlhagogang ba tshwaragane le barutabana le batsadi.
Rre Kolagano o supile fa e ne ya re ka Seetebosigo 2016 Kgosi Kgari III a rolela morafe wa Bakwena maikaelelo ao mme a supa gape fa batsadi ba tshwanetse go nna le seabe se se bonalang mo thutong.
A re go supafala mo dipegong tsa bone tsa kgwedi le kgwedi fa boitsholo jwa bana bo tokafetse thata mo nakong eno mo dikoleng tsa Molepolole mme a re se se supa fa letsholo leo le ka nowa moro.
A re mo dingwageng tsa bo 2015 boitsholo jwa baithuti mo Kgari Sechele bo ne bo sa jese diwelang, a tlatsa ka go re dintwa tsa bana ba sekole jaanong di ritibetse ka paka e kgona go wela go sena pego epe ya dintwa mo baneng.
Rre Kolagano o ne a fa go na le tokafalo mo go tseyeng maduo a bana ke batsadi. BOKHUTLO