20 May 2018

Ba botsogo jwa tikologo mo khanseleng ya Kgatleng ba tlhalosa fa ba gatetse pele ka lenaneo la go tseela setshaba matlakala mo malwapeng e bile ba tsweletse ka go rotloetsa banni go nna le ditanka tsa matlakala mo malwapeng.

E rile a bua mo potsolotsong le BOPA, mogolwane wa botsogo jwa tikologo, Rre Thabo Lesejane o ne a tlhalosa fa ba fitlheletse lenaneo la go tseela setshaba matlakala mo malwapeng mme a re ba ka kgotsofala fa malwapa otlhe a ka felela a atlile tirelo eo.

Rre Lesejane o ne gape a gatelela fa setshaba se tshwanetse go ithotloetsa ka jaana ditirelo tsa bone tsa go tsaya matlakala mo malwapeng di le tlhwatlhwa tlase ka jaana madi otlhe a ngwaga e le P150 go kopantswe madi a theko ya tanka le tlhwatlhwa ya go tseelwa matlakala beke le beke.

O supile fa tirelo e nngwe e batho ba sa e diriseng thata e le ya go hirisa sekipi go olela matlakala a mantsi a tshwana le a ditlhare a tlhwatlhwa ya teng e leng P45.

A re ba dira maiteko a gore setshaba se tseelwe matlakala beke le beke, a tlatsa ka go re ba bereka le ba dikompone tse di ikemetseng e le tsela ya go fefosa tirelo eo le go netefatsa fa ba direla setshaba ka bonokopila.

Rre Lesejane a re khansele e rotloetsa setshaba go ithekela ditanka ka jaana ba atle ba itemogele kgwetlho ya madi e e ba itsang go di reka ka bontsi.

A re setshaba se tshwanetse go etela diofisi tsa botsogo jwa tikologo go botsa le go itseela dikgang ka botlalo gammogo le go ithuta ka ditirelo tsa bone.

O supile matshwenyego a gore batho bangwe ba tshubela matlakala mo ditankeng tseo.

A re go dira jalo ga go a siama ka e bile go tshuba matlakala e le molato o motho a ka o otlhaelwang.

A re batho ba go nna jalo ba dirwa ke go tlhoka go duela ditirelo tsa go tseelwa matlakala, a tlatsa ka go re nako ya go fetola mekgwa le tsamaiso e tshwana le ya go tshuba matlakala le go leswafatsa tikologo e fitlhile.

Rre Lesejane o supile fa go nna le ditanka tsa matlakala e bile di duelwa sentle go ka fokotsa diemo di tshwana le go gasagasa matlakala le gone go a baya mo ditseleng ga mmogo le go tshuba matlakala mo malwapeng.

A re go a swabisa go bo batho bangwe ba santse ba tshuba matlakala ntswa ba na le ditanka, seeemo se a rileng se tsenya matshelo a batho mo diphatseng tsa go tsenwa ke malwetse le gone go kgotlela phefo.

O kaile fa ba tshwenngwa gape ke seemo sa go latlhwa ga matlakala mo go seng ka fa molaong mme a gatelelela fa ba na le ditirelo tse di maleba e bile di le tlhwatlhwa tlase go thusa go tsaya selekanyo sa matlakala otlhe a motho a batlang a ka tsewa.

A re setshaba se ka ikuela kwa diofising tsa bone fa ba na le dingongorego mabapi le dikgang tse di amanang le botsogo jwa tikokologo di akaretsa go tshujwa ga matlakala mo a rileng setshaba se ka ikuela gape le kwa mapodising ga mmogo le ba Green Scorpion ba le bone ba nang le dithata tsa go diragatsa melao e e amang tikologo.

Kwa bokhutlong, Rre Lesejane o ne a gwetlha setshaba go tsaya tsia dikgang tsa botsogo jwa tikologo, tshireletsego ya yone le gone go tsaya ka tlhoafalo dithuto le mananeo a ofisi ya gagwe, le go tsaya karolo mo malatsing a a seegetsweng fa thoko a tshomarelo tikologo a tshwana le letsatsi la mafatshefatshe la tikologo. BOKHUTLO