10 May 2018

Mme Justinah Motshidisi wa mokgatlho wa Basamarea ba ba molemo a re go nna le lorato mo bagoding go mo gwetlhile go simolola go ba fepa ka dijo ka matsatsi a ntlha a mabedi a ba amogedisiwang ka one ka jaana a tshabelelwa ke mosuke.

“Ga ke batle go bona motho yo mongwe a sotlega.” A bua jalo Mme Motshidisi. A re go mo mading a gagwe gore a thuse motho.

 A re o sale a batlile go dira jaana ka 2008 mme ga retela. Ke gone ka moo a ileng a itshwaraganya le Charity Hiscox le Pearl Nkoane go netefatsa gore toro ya gagwe e a diragadiwa.

Morago ga moo o ne a ikopanya le kgosi wa Bokaa yo o neng a atla mogopolo wa gagwe. O ne a bolela fa bagolo ba ne ba akanya fa ba tshwanelwa ke go duelela dijo mme a ba tlhalosetsa fa go sa nna jalo.

O boletse fa batho ba Bokaa le bone ba mo eme nokeng tota mo ba etleng ba kope gore a tsenye batho bangwe mo lenaneong la gagwe.

O bolela fa bagolo ba bangwe ba tlhola ka tlala mo e reng a tsena ka dijo ba batla go ja gone fela foo.

Mma Motshidisi o boletse gore pele ga a tsenya mogolo mo lenaneong la tlhokomelo, o ikopanya le bana ba lelwapa a bo a ba bolelela ka maikaelelo a gagwe, ka gore bana ba bangwe ba na le go akanya gore ba a tlontlololwa fa batsadi ba bone ba fiwa dithuso.

Ntle le go fa bagolo dijo fa ba tsile go amogela, ka Mosupologo, Laboraro le Labotlhano wa beke nngwe le nngwe ba apeela bagolo ba le masome a mabedi le botlhano mo kwa Bokaa a bo ba ba isetsa dijo.

O tlhalosa fa nako tse dingwe a tshwanelwa ke go phephafatsa fa bagodi ba bangwe ba nnang teng gonne bana ba ba tlogetse ba le esi, mme ba le bokoa. 

O boletse fa a na le bagodi ba bangwe ba le lesome le borataro kwa Pilane ba a ntseng a ba isetsa dijo. A re o feletse a ba kopa gore ba nne ba tla go itseela dijo ka ntata ya letlhoko la sepalamo mme ga ba kgone go dira jalo.

‘Fa go bua e ne e le go dira, ke ka bo ke tseela bagodi ba mo lefelong le le lengwe gore ba kgone go fitlhola, ba je motshegare le selalelo gonne tlala e a koafatsa.’

Mosamarea yo o boletse fa diemo tse dingwe tse a kopanang natso di ngomola pelo. O file sekai ka mongwe yo o setseng a kopile ba tlhokomelo balwetse kwa malapeng gore ba mo thuse gonne a nna a le nosi.

Mma Motshidisi o itemogetse fa go le bobotlana e bile ba tlhaelelwa mme o kopa batho gore ba tle go mo thusa gore a kgone go isa toro ya gagwe ko pele, a tlatsa ka go re go sego letsogo le le abang go na le le le amogelang.

Nngwe ya dikgwetlho ke tlhaelo ya bathusi. A re kwa tshimologong, o ne a na le bathusi ba le bane mme ba mo phuagantse. Kgwetlho e nngwe ke gore letsatsi le kgona go phirima a ise a bone se a yang go se fa bagodi mo letsatsing le le latelang.

Le fa go ntse jalo, Mma Motshidisi o setse a ile kwa go molaodi wa Mochudi, yo o mo solofeditseng go mmatlela lefelo la fa a ka direlang teng. Molaodi o mo solofeditse go mo direla lekwalo le a tlaa kopang dithuso ka lone mo dikomponeng le makalana a a farologaneng.

Mongwe wa bagolo ba ba setseng ba tswetswe mosola ke lenaneo le, Rre Rankwane Thamaga wa kwa Morwa, a re o leboga go menagane ka e bile mme yoo a ba fa dijo tse ka lorato. 

“Ga ke mmue bontle ka ke mmona, mme yo o tsile go ratwa ke Modimo le batho,” a digela Rre Thamaga.

Mmaposo wa Bokaa, Mme Tumisang Bareetseng a re o fitlhetse lenaneo le mme o a le lebogela. A re bagolo ba tla ka mmetela ka malatsi a go amogela a a fa sekai sa gore ka letsatsi la Motsheganong a tlhola gabedi, ba amogedisitse bagolo ba le 153, mme batswa bokgakaleng jwa Morwa, Pilane le Mochudi. BOKHUTLO