08 May 2018

Molomaganya  mafoko mo lephateng la tlhabololo banana, metshameko le ngwao mo kgaolong ya kgalagadi, Mme Betty  Gaotilwe a re dipaakanyo tsa maitiso a  Khawa Dune Challenge & Culture Festival  di tsamaya sentle ka ba sale ba simologa ka go bopa komiti e e tlaa bong e eteletse pele  go tlhomamisa gore  moletlo o a atlega.

Mme Gaotilwe o buile mafoko a  mo dipuisanoyng le BOPA  bosheng, a tlhalosa  fa ngwaga ono e le wa botlhano moletlo o o wa Khawa Dune Challenge & Culture Festival o ntse o tsweletse ka go tshwarwa, selo se a reng se tlotlomaditse motse oo le go isa kwa godimo serodumo sa kgaolo  ya Kgalagadi ka o ratwa bobe ke Batswana lefatshe ka bophara le bajanala go tswa mono le kwa mafatsheng a sele.

A re moletlo oo o tla tshwarwa kgwedi  eno e le lesome go fitlha e le lesome le boraro mme ba solofetse dipalo tse di fetang tsa ngwaga oo fetileng tse di fetang  dikete di supa.

Molomaganya  mafoko mo lephateng la banana, metshameko le ngwao mo Kgalagadi a re gareng ga metshameko e e  natifisang maitiso ao  mo maitsiboeng e tlaa nna ditlhopha tsa mmino wa mmamoratwa wa polka, setapa, borankana, tsutsube, leboko, dikhwaere, bente, le tse dingwe fa mo motshegareng e tlaa bo e le mabelo a dithuuthuu, dikammela, a batho le gone go oketsa ka o mosha wa  mabelo a dikoloi tsa 4x4  di siana ka go dikologa, metshameko ya kgwele ya dinao le e mengwe.

O kaile fa ba solofetse metlaagana e le masome mararo  e e phadisanelwang ka khupelekhupele jaaka tlwaelo, maikalelo e le go tokafatsa matshelo, bogolo jang  a banni ba Khawa, bagwebi ba babotlana ba mananeo a puso  a a farologanyeng  le ba ba ikemetseng mo kgaolong ya Kgalagadi.

Mme Gaotilwe a re maikaelelo magolo a Khawa Dune Challenge & Culture Festival  le go oka bajanala, go tsosolosa le go tlotlomatsa ngwao ka bodiragatsi le gone go tokafatsa le go tlhabolola matshelo a banni ba koo ka ba kgona go oba letsogo mo thekisong ya dithoto.

Go ya ka Mme Gaotilwe, mo  ngwageng ono  ba  mokgatlho wa baikopanyi wa Trust ya Khawa ke bone ba ba neetsweng boikarabelo jwa go baakanyetsa baeng boroko go tlhoma ditente  mo kampeng ya bone gore ba tle ba kgone go bona letseno la  madi go tlhabolola Trust eo le motse wa bone.

A re  gape  mo kgorwaneng  go tlaa bo go tswenwa ka matsana fela a e seng a sepe go etleetsa ba komiti ya ditlhabololo tsa motseng oo.

A re gareng ga baeng ba ba solofetsweng  go akarediwa Tautona Mokgweetsi Masisi, Tautona wa bone  Lt.  Gen  Dr Seretse Khama Ian Khama, yo e leng ene morotloetsi mogolo mo go tsosoloseng ngwao.

Mme Gaotilwe o boleletse BOPA fa ba solofetse gape tona wa lephata la tlhabololo banana, metshameko le ngwao, mothusi wa gagwe le badirelapuso ba maemo a a kwa godimo. BOKHUTLO