08 May 2018

Mogoditshane o tlaa tsenngwa dipone tse di bonesang mo mekgwatheng go lwantsha lefifi le le aparetseng motse oo e bile gape le gakatsa borukutlhi.  

Se se tlhalositswe ke modulasetilo wa khansele ya Kweneng, Rre Jeffery Sibisibi fa a buisa phuthego ya kgotla kwa Mogoditshane e le bontlha bongwe jwa diphuthego tse a tsweletseng ka go di buisa mo metseng e e mo kgaolong ya Kweneng.

Rre Sibisibi o tlhalositse fa keletso e ne e le go tsenya dipone tse di bonesang mo ditseleng, mme go sa kgonagala ka mabaka a tlhaelo ya madi.

A re ntswa Mogoditshane a na le mathata a ditsela tse di sa siamang, o bone go le maleba go tla go bolelela morafe ka tse khansele e di dirang le fa go na le tlhaelo ya madi e e sa leteng gore ditlhabololo di dirwe ka nako e le nngwefela.

 Le fa go ntse jalo, o kopile morafe go tsenya leitlho mo ditirelong tsotlhe tse di tlaa dirwang go netefatsa gore di dirwa sentle.

E rile ba mo kgwa dikgaba, morafe o ne wa amogela ditlhabololo tse di tsisiwang ke khansele.

Mongwe wa bone, Rre Anthony Serokane o boletse fa a itumelela kgang ya dipone, a tlhalosa fa Mogoditshane a na le palo e ntsi ya batho mo go bakang gore motse o gole mo nakong e khutshwane.

A re dipone tseo di tlaa thusa thata mo go lwantsheng borukutlhi. 

O kopile gore ditlhabololo di fefosiwe go lepalepana le kgolo ya motse.

Le fa go ntse jalo, bangwe ba ne ba kaya fa ba na le lesokolela ka mokgwa o ditlhabololo mo motseng di tlang ka teng. 

Rre Oleratang Ofetile o kopile khansele ya Kweneng go lere pego ya madi kwa morafeng le gone go direla dilo mo pontsheng.

Mopalamente wa kgaolo, Rre Sedirwa Kgoroba fa a latlhela la gagwe, o boleletse bogogi jwa khansele fa Mogoditshane a na le mathata a ditsela.

 A re kwa dikoleng le gone go na le mosuke o o feteletseng. 

A re borukutlhi jo bo aparetseng motse oo, bo bakwa ke palo e ntsi ya bana ba ba sa atlegang kwa dikoleng. 

Mo go tse dingwe, o gakolotse khansele gore Mogoditshane o tlhoka go direlwa ditlhabololo ka tsela e e faphegileng ka e le motse setoropo e bile o arametse mosi wa batho go tswa toropokgolo. 

A re le fa ba amogela dipone e bile ba di itumelela, o tshwenngwa ke gore ditlhabololo tsa go tshwana le tse di tsaya nako go diragadiwa. BOKHUTLO